لاہور: پنجاب اسمبلی میں ہونے والے سینیٹ کی خالی نشست کے لیے ضمنی انتخاب کے غیر سرکاری اور غیر حتمی نتائج سامنے آ گئے ہیں، جن کے مطابق مسلم لیگ (ن) کے رہنما رانا ثناء اللہ سینیٹر منتخب ہو گئے ہیں۔

اسمبلی میں دن بھر جاری رہنے والی پولنگ کا عمل بلا تعطل مکمل ہوا، جو مقررہ وقت کے مطابق شام چار بجے ختم ہو گیا۔

غیر سرکاری اور غیر حتمی نتائج کے مطابق اسمبلی کے ایوان میں دو پولنگ بوتھ قائم کیے گئے، جہاں کل 251 ووٹ کاسٹ ہوئے، رانا ثنا اللہ 250ووٹ لیکر سینیٹر منتخب ہوئے جبکہ ایک ووٹ مسترد ہوا۔

 رانا ثناء اللہ کو سادہ اکثریت سے زیادہ ووٹ حاصل ہوئے جبکہ اپوزیشن کی جانب سے انتخاب کا بائیکاٹ کیا گیا تھا، جس کے باعث انتخابی نتائج یکطرفہ رہے۔

ذرائع کے مطابق رانا ثناء اللہ کو 263 ووٹوں کی حمایت حاصل تھے جبکہ کامیابی کے لیے 181 ووٹ درکار تھے۔

دوسری جانب اپوزیشن امیدوار سلمیٰ اعجاز کو صرف 100 ووٹوں کی حمایت حاصل تھی اور اپوزیشن جماعتوں نے انتخابی عمل کا بائیکاٹ کر دیا تھا۔

ڈپٹی اپوزیشن لیڈر معین قریشی نے واضح اعلان کیا کہ اپوزیشن ضمنی انتخاب میں حصہ نہیں لے گی اور اگر کوئی رکن ووٹ کاسٹ کرتا ہے تو وہ پارٹی پالیسی کی خلاف ورزی کا مرتکب ہوگا۔

پنجاب اسمبلی کی کل نشستیں 371 ہیں، جن میں سے 8 خالی ہیں جبکہ 363 ارکان اسمبلی موجود ہیں۔ موجودہ پارٹی پوزیشن کچھ یوں ہے:

مسلم لیگ (ن): 229

پیپلز پارٹی: 16

آئی پی پی: 7

مسلم لیگ (ق): 11

سنی اتحاد کونسل: 73

تحریک انصاف: 24

تحریک لبیک، مسلم لیگ ضیا، مجلس وحدت مسلمین: 1،1 ووٹ

یہ نشست پی ٹی آئی کے سابق سینیٹر اعجاز چوہدری کی 9 مئی کیسز میں سزا کے بعد خالی ہوئی تھی۔ حکومتی اتحاد کی عددی برتری کے باعث رانا ثناء اللہ کی کامیابی کو یقینی قرار دیا جا رہا تھا۔