لاہور: وزیراعلیٰ پنجاب مریم نواز شریف نے سیلاب متاثرین کے نقصان کا ازالہ کرنے کیلئے اہم فیصلے کرلیے ہیں۔

وزیراعلیٰ مریم نواز کی زیر صدارت خصوصی اجلاس منعقد ہوا جس میں پنجاب میں سیلاب متاثرین بحالی آپریشن شروع کرنے کا فیصلہ کیا گیا۔

مریم نواز نے ڈسٹرکٹ اور تحصیل کی سطح پر فلڈ ریلیف کمیٹیاں قائم کردیں اور سیلاب متاثرین کی امداد کیلئے آسان ترین طریقے کار وضع کرنے کی بھی ہدایت دے دی۔

اجلاس میں سیلاب متاثرین کیلئے سروے فارم، موبائل ایپ اور مانیٹرنگ ڈیش بورڈ بھی قائم کردیا گیا اور بتایا گیا کہ وزیراعلیٰ مریم نوازشریف ڈیش بورڈ پر خود سیلاب متاثرین کی امداد کی مانیٹرنگ کریں گی۔

مزید پڑھیں: سیلابی ریلے کے باوجود کوئی بڑا جانی نقصان نہیں ہوا، اللہ کا شکر ہے، مریم نواز

اجلاس میں ریونیو ڈیپارٹمنٹ رپورٹ میں بتایا گیا کہ پنجاب کے 27 اضلاع، 64 تحصیل میں 3775 موضع سیلاب سے متاثر ہوئے، سیلاب سے 63200 پکے اور 309684 کچے مکانات متاثر ہوئے، تاہم سیلاب متاثرین کے سروے کیلئے ٹیم میں اربن یونٹ، ریونیو، زراعت اور آرمی کے نمائندے شامل ہوں گے۔

وزیراعلیٰ مریم نواز نے سیلاب متاثرہ علاقوں میں سڑکوں، پلوں اور انفرااسٹرکچر کی فوری بحالی کا بھی حکم دیا اور کہا کہ حکومت سیلاب متاثرین کی بھرپور امداد کیلئے یکسو ہے۔

انہوں ںے مزید کہا کہ حکومت کو سیلاب متاثرین تک خود پہنچنا چاہیے، سیلاب متاثرین کو امداد کی ترسیل کیلئے زیادہ کیمپ اورپوائنٹس قائم کیے جائیں، دل کھول کر سیلاب متاثرین کی مدد کرنی ہے، ہر فرد کے نقصان کا ازالہ کریں گے، کوئی ریلیف سے محروم نہ رہے۔