دبئی میں آج کرکٹ کا سب سے بڑا ٹاکرا ہونے جا رہا ہے، ایشیا کپ 2025 کے سپر 4 مرحلے میں پاکستان اور بھارت آمنے سامنے ہوں گے۔ قومی شاہین گزشتہ شکست کا بدلہ چکانے کے عزم کے ساتھ میدان میں اتریں گے جبکہ بھارتی سورما اپنی برتری برقرار رکھنے کے خواہاں ہیں۔

ایشیا کپ سپر 4 مرحلے میں دونوں ٹیمیں آج دبئی میں ہی پھر نبرد آزما ہوں گی، میچ پاکستانی وقت کے مطابق شام ساڑھے 7 بجے شروع ہوگا۔

گروپ میچ میں بھارت نے پاکستان کو سات وکٹوں سے شکست دی تھی، مگر اب گرین شرٹس پچھلی ہار کا بدلہ لینے کے لیے پرعزم ہیں۔ میچ کے لیے وہی اسٹیڈیم، وہی ٹیمیں اور میچ ریفری اینڈی پائی کرافٹ ہوں گے۔

گزشتہ روز قومی اسکواڈ نے دبئی کرکٹ اکیڈمی میں بھرپور پریکٹس کی۔ اس موقع پر بھارتی فینز نے بھی پاکستانی ٹیم کا استقبال کیا اور اپنے پسندیدہ کھلاڑی فخر زمان کے ساتھ تصاویر اور آٹوگراف لیے۔

ادھر چیئرمین پی سی بی محسن نقوی نے بھی اکیڈمی کا دورہ کیا، جہاں انہوں نے کوچ مائیک ہیسن اور کپتان سلمان علی آغا سے گفتگو کی اور کھلاڑیوں سے ملاقات کرکے ان کا حوصلہ بڑھایا۔

ٹیم مینجمنٹ نے میچ کی حکمت عملی طے کرتے ہوئے اوپنر صائم ایوب کا بیٹنگ آرڈر تبدیل کرنے کا فیصلہ کیا ہے، انہیں اوپننگ کے بجائے نمبر چار پر بھیجا جاسکتا ہے جبکہ فائنل الیون میں بھی تبدیلی متوقع ہے اور امکان ظاہر کیا جارہا ہے کہ حسن نواز کی جگہ حسین طلعت ٹیم کا حصہ بنیں گے۔ بولنگ میں فاسٹ باؤلرز شاہین شاہ آفریدی اور حارث رؤف ہی قیادت کریں گے۔

کرکٹ فینز کا کہنا ہے کہ آج کا مقابلہ صرف ایک میچ نہیں بلکہ بدلے کا دن ہے اور وہ پرامید ہیں کہ پاکستان ٹیم اس بار بھارتی غرور خاک میں ملا دے گی۔