اقوام متحدہ کے ہیڈکوارٹرز میں جنرل اسمبلی کے 80 ویں اجلاس کے موقع پر ایک اہم کثیرالجہتی اجلاس منعقد ہوا، جس کی میزبانی امریکی صدر ڈونلڈ جے ٹرمپ اور امیرِ قطر شیخ تمیم بن حمد الثانی نے کی۔

اجلاس میں عرب لیگ، او آئی سی اور امریکہ کے رہنماؤں نے شرکت کی، جس میں خطے میں امن، غزہ کی صورتحال اور فلسطینی عوام کے حقوق پر تفصیلی بات چیت کی گئی۔

اجلاس میں وزیراعظم پاکستان شہباز شریف، ترک صدر رجب طیب ایردوان، شاہ اردن عبداللہ دوم، انڈونیشیا کے صدر پرابوو سبیانتو، مصر کے وزیراعظم مصطفی کمال مدبولی، سعودی و اماراتی وزرائے خارجہ سمیت متعدد عرب و اسلامی ممالک کے رہنماؤں نے شرکت کی۔

شرکا نے صدر ٹرمپ کی قیادت اور تعاون کو خطے میں جنگ کے خاتمے اور پائیدار امن کی راہ ہموار کرنے میں اہم قرار دیا۔

مشترکہ اعلامیے کے مطابق شرکاء نے غزہ میں انسانی المیے پر گہری تشویش کا اظہار کرتے ہوئے جنگ بندی، یرغمالیوں کی رہائی اور انسانی امداد کی فوری فراہمی پر زور دیا۔

اجلاس میں فلسطینیوں کی جبری نقل مکانی کی مخالفت اور ان کی واپسی کے حق کی توثیق کی گئی۔

اعلامیے میں مغربی کنارے اور مقاماتِ مقدسہ کے استحکام، فلسطینی اتھارٹی میں اصلاحات اور غزہ کی تعمیر نو کے لیے عرب و او آئی سی منصوبے کی بنیاد پر جامع حکمتِ عملی پر اتفاق کیا گیا۔

بین الاقوامی تعاون اور فلسطینی قیادت کی سرپرستی میں تعمیر نو اور عوام کی بحالی پر زور دیا گیا۔

اجلاس کو خطے میں امن و استحکام اور بین الاقوامی شراکت داری کے لیے ایک نئے عمل کے آغاز کا سنگِ میل قرار دیا گیا۔

اجلاس میں شریک اہم عالمی اور علاقائی شخصیات نے مل کر فلسطین کے مسئلے کے پرامن اور دیرپا حل کے لیے اپنے عزم کا اعادہ کیا۔