کوالالمپور: وزیراعظم محمد شہباز شریف نے کہا ہے کہ ملائیشیا کے تجربے سے استفادے کے لیے مشترکہ منصوبوں کے خواہاں ہیں۔

وزیراعظم پاکستان شہباز شریف کے سرکاری دورہ ملائیشیا کے دوران دونوں ممالک کے درمیان مختلف شعبوں میں تعاون بڑھانے کے لیے متعدد مفاہمتی یادداشتوں پر دستخط کیے گئے۔

وزیراعظم شہباز شریف نے ملائیشیا کے وزیراعظم انور ابراہیم کے ہمراہ مشترکہ نیوز کانفرنس کی اور کہا کہ ملائیشیا پاکستان کا دوسرا گھر ہے، اس ملک کی ترقی میں وزیراعظم انور ابراہیم کا کردار لائق تحسین ہے۔

انہوں نے کہا کہ پاکستان کی ایک بڑی تعداد میں طلبہ ملائیشیا میں زیر تعلیم ہیں، جو دونوں ممالک کے تعلقات کی مضبوطی کی علامت ہے۔

شہباز شریف نے پاکستان سے 20 کروڑ ڈالر مالیت کے حلال گوشت کی برآمد کے فیصلے کا خیرمقدم کیا اور کہا کہ وقت کے ساتھ ساتھ اس شعبے کو مزید وسعت دی جائے گی۔

 انہوں نے ملائیشین وزیراعظم انور ابراہیم کی کتاب ’’اسکرپٹ‘‘ کے اردو ترجمے کی تقریب رونمائی میں شرکت کی اور کتاب کو اعلیٰ علمی کاوش قرار دیا۔

ہمیں تمام شعبوں میں تعاون میں اضافے کی ضرورت ہے، ملائیشین وزیراعظم

دوسری جانب ملائیشیا کے وزیراعظم انور ابراہیم نے کہا کہ پاکستان کے ساتھ تعلقات 1957 سے قائم ہیں اور وقت کے ساتھ مزید مستحکم ہوئے ہیں، تجارت، سرمایہ کاری اور تعلیم سمیت مختلف شعبوں میں تعلقات کو فروغ دیا جا رہا ہے۔

ملائیشین وزیراعظم نے بتایا کہ ملاقات میں خطے کی صورتحال، دہشت گردی پر قابو پانے، پاک-بھارت امن اور غزہ کے عوام پر اسرائیلی مظالم کے حوالے سے تفصیلی گفتگو ہوئی۔

انہوں نے کہا کہ ہم دونوں چاہتے ہیں کہ فلسطینی عوام کی مشکلات ختم ہوں، اور اس مقصد کے لیے مل کر آواز بلند کرتے رہیں گے۔

وزیراعظم انور ابراہیم نے یہ بھی کہا کہ دہشت گردی پر قابو پانے کے لیے پاکستان کے ساتھ ہر ممکن تعاون کریں گے اور خطے میں امن قائم کرنے کی موجودہ کوششوں کی مکمل حمایت کرتے ہیں۔

آخر میں وزیراعظم شہباز شریف نے ملائیشیا کے عوام اور قیادت کی جانب سے پرتپاک استقبال پر شکریہ ادا کیا اور کہا کہ یہ دورہ دوطرفہ تعلقات کو مزید مضبوط بنانے میں سنگ میل ثابت ہوگا۔