کراچی: سی او او واٹر کارپوریشن انجینئر اسداللہ خان نے کہا ہے کہ پانی کی چوری کسی بھی صورت برداشت نہیں کی جائے گی۔

انجینئر اسداللہ خان نے رینجرز کے اعلیٰ حکام کے ہمراہ ناظم آباد کا دورہ کیا، جہاں پانی چوری کے خاتمے اور پانی کی منصفانہ فراہمی کے لیے جاری آپریشن کا تفصیلی جائزہ لیا گیا۔

دورے کے دوران صدر سائٹ ایسوسی ایشن احمد عظیم اور سلیم بارک بھی موجود تھے۔

سی او او واٹر کارپوریشن نے سائٹ ایسوسی ایشن کے عہدیداران کو آپریشن کی پیش رفت سے متعلق تفصیلی بریفنگ دی اور مستقبل کی حکمتِ عملی پر روشنی ڈالی۔

اس موقع پر انجینئر اسداللہ خان کا کہنا تھا کہ رینجرز نے اس آپریشن کی کامیابی میں کلیدی اور مثالی کردار ادا کیا جبکہ اینٹی تھیفٹ سیل واٹر کارپوریشن نے بھی غیر معمولی کارکردگی کا مظاہرہ کیا۔

 انہوں نے بتایا کہ مشترکہ کارروائی کے دوران آٹھ غیر قانونی کنکشنز منقطع کیے گئے جس کے نتیجے میں پانی چوری میں ملوث ایک بڑا منظم نیٹ ورک بے نقاب ہوا ہے۔

سی او او واٹر کارپوریشن کا کہنا تھا کہ پانی چوری شہر میں پانی کی قلت کی بڑی وجہ ہے اور اس غیر قانونی عمل کے باعث عام شہریوں کو پانی کی شدید کمی کا سامنا کرنا پڑتا ہے۔

انہوں نے مزید کہا کہ میئر کراچی بیرسٹر مرتضیٰ وہاب کے واضح احکامات کے مطابق پانی چوری کسی بھی صورت برداشت نہیں کی جائے گی اور اس غیر قانونی عمل میں ملوث عناصر کے خلاف کسی قسم کی رعایت نہیں برتی جائے گی۔

انجینئر اسداللہ خان نے اس عزم کا اظہار کیا کہ پانی چوری میں ملوث افراد کے خلاف سخت قانونی کارروائی عمل میں لائی جائے گی اور پانی چوروں کو کیفرِ کردار تک پہنچانے میں کوئی کسر نہیں چھوڑی جائے گی۔

 دوسری جانب سائٹ ایسوسی ایشن کے عہدیداران نے رینجرز اور واٹر کارپوریشن کی کامیاب کارروائیوں کو سراہتے ہوئے کہا کہ یہ اقدامات شہر کے مفاد میں نہایت اہم اور قابلِ ستائش ہیں۔

انہوں نے رینجرز اور واٹر کارپوریشن کو خراجِ تحسین پیش کرتے ہوئے اس امید کا اظہار کیا کہ پانی چوری کے خلاف یہ سلسلہ جاری رہے گا تاکہ کراچی کے عوام کو بہتر اور منصفانہ پانی کی فراہمی یقینی بنائی جا سکے۔