واشنگٹن: امریکی صدر ڈونلڈ ٹرمپ نے کہا ہے کہ اگر حماس بین الاقوامی معاہدے اور جنگ بندی پر عمل نہیں کرتی تو اسرائیل کو دوبارہ فوجی کارروائی شروع کرنے کی اجازت دیں گے۔

وائٹ ہاؤس میں میڈیا سے گفتگو کرتے ہوئے امریکی صدر ڈونلڈ ٹرمپ نے کہا کہ حماس کو جنگ بندی معاہدے پر عمل کرنا ہوگا اور غیرمسلح ہونا ہوگا، بصورت دیگر امریکا خود کارروائی کرے گا۔

انھوں نے خبردار کیا کہ معاہدے پر عمل نہ ہونے کی صورت میں اسرائیل دوبارہ جنگ اس وقت شروع کرے گا، جب وہ اسرائیل کو جنگ شروع کرنے کا کہیں گے۔

ٹرمپ نے ایک بار پھر دعویٰ کیا کہ انہوں نے دنیا میں 8 جنگیں رکوائیں اور 6 تنازعات کو ٹیرف کے ذریعے ختم کیا۔

صدر ٹرمپ نے پاک بھارت جنگ رکوانے کا ایک بار پھر کریڈٹ لیتے ہوئے کہا پاکستانی وزیراعظم شہباز شریف نے انہیں کہا کہ “آپ نے لاکھوں زندگیاں بچائیں”، جبکہ بھارتی وزیراعظم نے یقین دلایا ہے کہ وہ روسی تیل نہیں خریدیں گے۔

ٹرمپ نے کہا کہ روسی صدر کو جارحیت بند کرنے کا مشورہ دیا ہے اور امریکا یوکرین جنگ ختم کرانے کی کوشش کرے گا۔

ایک بار پھر پاک بھارت جنگ کا ذکر کرتے ہوئے صدر ٹرمپ نے کہا کہ پاک بھارت جنگ میں 7 طیارے گرائے گئے اور دونوں ممالک ایٹمی جنگ کے قریب پہنچ گئے تھے، ٹرمپ کا کہنا تھا کہ ایران نے بھی حماس کی حمایت سے ہاتھ اٹھالیا ہے۔

 صدر ٹرمپ نے امریکا کی اندرونی صورتحال پر اظہار خیال کرتے ہوئے کہا کہ آپریشن “سمر ہیٹ” (Operation Summer Heat) میں اہم کامیابیاں حاصل ہوئی ہیں، ملزمان کی گرفتاری اور جرائم کی روک تھام میں پیش رفت ہوئی ہے، اور وفاقی کارروائیوں کو مزید شہروں تک بڑھایا جائے گا۔

ٹرمپ نے واشنگٹن اور دیگر امریکی شہروں میں بدامنی پر تشویش کا اظہار کرتے ہوئے کہا کہ بعض شہروں کی حالیہ جرائم کی صورتحال دنیا کے جنگ زدہ علاقوں کے برابر یا اس سے بدتر ہے، اور جب عوام نے ہمیں مینڈیٹ دیا تو ہم نے جرائم پیشہ افراد کے خلاف سخت قدم اٹھائے۔

ان بیانات کے دوران انہوں نے شکاگو میں گذشتہ ہفتے ہونے والے کئی قتلوں کا حوالہ بھی دیا۔

امریکی صدر نے مزید کہا کہ بائیڈن دور میں محکمہ انصاف نے ان کے خلاف انتقامی کارروائیاں کیں، جبکہ اسپیکر نینسی پلوسی ان کے بیٹے ایرک ٹرمپ کو عمر قید دلوانا چاہتی تھیں۔

ٹرمپ نے کہا کہ وہ ٹیرف کے خلاف مقدمے میں امریکی سپریم کورٹ میں جیتیں گے۔