اسلام آباد: پاکستان کی وزارتِ اطلاعات و نشریات نے افغان طالبان رجیم اور بھارتی نیٹ ورکس کی جانب سے چلائے جانے والے جھوٹے اور گمراہ کن پروپیگنڈا کا پردہ چاک کردیا۔

ترجمان وزارتِ اطلاعات کے مطابق بھارت اور افغان طالبان سے منسلک سوشل میڈیا اکاؤنٹس منظم انداز میں پاکستان کے خلاف جعلی خبریں، پرانی ویڈیوز اور گمراہ کن تصاویر پھیلا رہے ہیں۔

چمن اجتماع کی پرانی ویڈیوز کو نیا ظاہر کیا گیا

وزارتِ اطلاعات نے بتایا کہ سوشل میڈیا پر پھیلائی جانے والی ویڈیوز دراصل دسمبر 2022 کے چمن اجتماع کی ہیں، جنہیں نئے واقعات کے طور پر پیش کرکے عوام کو گمراہ کیا جا رہا ہے۔

ترجمان نے کہا کہ یہ تمام مواد ایک منظم پروپیگنڈا مہم کا حصہ ہے جس کا مقصد پاکستان کے امن و استحکام کو نقصان پہنچانا ہے۔

جھوٹے بیانیے اور من گھڑت خبریں، طالبان رجیم کا ایجنڈا

ترجمان کے مطابق افغان طالبان رجیم کے زیرِ اثر سوشل میڈیا نیٹ ورکس جھوٹا بیانیہ پھیلا کر حقیقت کو مسخ کر رہے ہیں۔ یہ مہم پاکستان کے اداروں کے خلاف نفرت اور انتشار پھیلانے کے لیے ترتیب دی گئی ہے۔

وزارتِ اطلاعات نے واضح کیا کہ بھارت پاکستان دشمن سازشوں میں افغان پروپیگنڈا مشین کا سب سے بڑا سہولت کار ہے۔ دونوں ممالک کے یہ نیٹ ورکس مشترکہ طور پر جھوٹا مواد پھیلا کر پاکستان کے خلاف عالمی سطح پر منفی تاثر پیدا کرنے کی کوشش کررہے ہیں۔

ترجمان نے مزید کہا کہ پاکستان کے خلاف پروپیگنڈا مہم ناکام ہوگی۔ حقیقت مسخ کرنے اور عوام کو گمراہ کرنے کی ہر کوشش کا مؤثر جواب دیا جائے گا۔