ڈی جی آئی ایس پی آر لیفٹیننٹ جنرل احمد شریف چوہدری نے واضح کیا ہے کہ پاک فوج دفاع وطن کیلئے پرعزم ہے، کسی بھی بیرونی جارحیت  کا جواب سخت اور شدید ہوگا۔

ڈائریکٹر جنرل (ڈی جی) انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے ایبٹ آباد میں مختلف جامعات کے اساتذہ اور طلبا کے ساتھ خصوصی نشست میں حالیہ پاک–افغان کشیدگی، ملکی سیکیورٹی صورتحال اور معرکہ حق سمیت متعدد اہم موضوعات پر گفتگو کی۔

نشست میں بڑی تعداد میں اساتذہ اور طلبا نے شرکت کی۔ گفتگو کے دوران ڈی جی آئی ایس پی آر نے واضح کیا کہ پاکستان نے دہشت گردی اور فتنہ الخوارج کے خلاف مؤثر اور جامع اقدامات کیے ہیں۔

انہوں نے کہا کہ پاک فوج وطن کے دفاع کے لیے پوری طرح پرعزم ہے اور کسی بھی بیرونی جارحیت کا جواب سخت اور مؤثر انداز میں دیا جائے گا۔

اس موقع پر اساتذہ اور طلبا نے شہداء اور غازیانِ وطن کو زبردست خراجِ تحسین پیش کیا۔

وائس چانسلر ہزارہ یونیورسٹی ڈاکٹر اکرام اللہ خان نے کہا کہ پاک فوج وطن سے محبت کا حقیقی استعارہ ہے، جو ہمیشہ محاذِ اول پر رہتی ہے، ہم اس کے شانہ بشانہ کھڑے ہیں۔

اساتذہ نے اس بات پر زور دیا کہ دشمن عناصر نوجوانوں کے ذہنوں کو گمراہ کرنے کے لیے سرگرم ہیں، اس لیے ضروری ہے کہ انہیں درست اور مصدقہ معلومات فراہم کی جائیں۔

طلبا نے کہا کہ اس نشست نے انہیں سوشل میڈیا پر پھیلائی جانے والی غلط افواہوں کے مقابلے میں درست معلومات حاصل کرنے کا موقع دیا۔

انہوں نے مزید کہا کہ ڈی جی آئی ایس پی آر کے جوابات نے ملکی اور صوبائی حالات سمیت افواجِ پاکستان کے حوالے سے پائے جانے والے ابہام دور کر دیے۔