وزیر خارجہ کے ترجمان نے بریفنگ میں پاکستان کی خودمختاری اور علاقائی سالمیت کے دفاع کے عزم کا اعادہ کیا۔ ان کا کہنا تھا کہ پاکستان اپنی سرزمین کی حفاظت میں کسی قسم کی کمیابی کو برداشت نہیں کرے گا۔

 ترجمان دفترخارجہ طاہراندرابی نے ہفتہ وار بریفنگ میں اہم بین الاقوامی امور پر بات کی۔ اس دوران وزیراعظم پاکستان کا سعودی عرب کا حالیہ دورہ اور افغانستان کے ساتھ تعلقات میں پیشرفت کے حوالے سے اہم معلومات فراہم کی گئیں۔

ترجمان نے بتایا کہ وزیراعظم پاکستان نے اعلیٰ سطحی وفد کے ہمراہ سعودی عرب کا دورہ کیا، جہاں انہوں نے سعودی ولی عہد سے ملاقات کی اور سعودی عرب کی فیوچرانویسٹمنٹ انیشیٹو کانفرنس میں شرکت کی۔

 دورے کے اختتام پر پاکستان اور سعودی عرب نے ایک مشترکہ اعلامیہ جاری کیا، جس میں دونوں ممالک کے تعلقات مزید مستحکم کرنے پر اتفاق کیا گیا۔

نائب وزیراعظم اسحاق ڈار نے سعودی وزیردفاع کے ساتھ اہم ملاقات کی، اور مختلف ممالک کے وزرائے خارجہ سے ٹیلیفونک رابطہ کیا۔ ان رابطوں میں دوطرفہ امور اور سرمایہ کاری کے حوالے سے تفصیلی گفتگو کی گئی۔

ترجمان نے اس بات کی وضاحت کی کہ پاکستان افغانستان کے ساتھ مزید کشیدگی نہیں چاہتا اور توقع ہے کہ افغانستان اپنی سرزمین پاکستان کے خلاف استعمال ہونے نہیں دے گا۔

انہوں نے کہا کہ پاکستان نے افغان طالبان کے ساتھ تعمیری انداز میں مذاکرات کا دوسرا دور مکمل کیا ہے اور افغانستان میں الخوارج اور فتنہ الہندوستان کی سرگرمیوں کے حوالے سے شواہد فراہم کیے ہیں۔

ترجمان دفترخارجہ نے واضح کیا کہ پاکستان اپنی علاقائی سالمیت اور خودمختاری کا بھرپور دفاع کرے گا، اور مستقبل میں کسی بھی جارحیت کا بھرپور جواب دیا جائے گا۔