بھارت پینترے بازی سے باز نہ آیا ، افغانستان کو دریا پر ڈیم کی تعمیر کا نیا جھانسہ دیدیا ۔ مودی سرکار افغان طالبان کے ساتھ ہر حال میں پینگیں بڑھانے پر بضد دکھائی دے رہی ہے ۔

افغانستان میں بھارت کی بڑھتی ہوئی مداخلت اور اثر و رسوخ خطے کے امن کےلئے کسی بھی وقت بڑا خطرہ بن سکتی ہے۔

کابل میں مودی مشن کو باضابطہ سفارتخانے کا درجہ دیے جانے پر بھی بھارت کا پیٹ نہ بھرا ، اب افغانستان کو دریا پر ڈیم کی تعمیر میں مدد کا نیا چھانسہ بھی دے ڈالا۔

ترجمان بھارتی وزارت خارجہ رندھیر جیسوال کے مطابق بھارت طالبان حکومت کی ہائیڈروالیکٹرک پروجیکٹس کی تعمیر میں مدد کرنے کو تیارہے۔

انھوں نے کہا کہ بھارت کے افغانستان کے ساتھ آبی وسائل اور پروجیکٹس میں تعاون کی تاریخ کافی  طویل ہے۔ان کا کہناتھاکہ افغان شہر ہرات میں قائم ڈیم بھی بھارت کی مدد و تعاون کے بغیر ناممکن تھا۔

قطر میں موجود طالبان کے سفیر سہیل شاہین نے تازہ بھارتی پیشکش کا خیرمقدم بھی کیاہے۔

واضح رہے کہ  امیرِ طالبان ملا ہبتہ اللہ اخوندزادہ نے دریائے کنڑ پر ڈیم کی تعمیر شروع کرنے کا حکم دے رکھا ہے۔

یہ حکم بھارت کے لئے غنیمت سے کم نہیں۔ پاکستان کو نقصان پہنچانے کے لیے موقع کی تاک میں رہنے والی مودی سرکار نے ڈیم کی  تعمیر کے لیے فوری طور پر اپنی خدمات پیش کردیں۔

دریائے کنڑ کا ماخذ پاکستان کے خوبصورت علاقے چترال میں ہے۔یہ  482 کلومیٹر کاسفر طے کرنے کے بعد دریائے کابل میں شامل ہوتا ہے۔