اسلام آباد: وزیراعظم شہباز شریف نے بابا گرو نانک کے 556 یوم ولادت اپنے جاری کردہ پیغام میں کہا کہ آج بابا گرو نانک دیو جی کے 556 یوم ولادت پر پاکستان اور دنیا بھر میں بسنے والی سکھ برادری کو پرخلوص اور دلی مبارکباد پیش کرتا ہوں۔

انہوں نے کہا کہ بابا گرو نانک دیو جی کا شمار نہ صرف سکھوں کے اکابرین میں ہوتا ہے بلکہ وہ ایک ایسے نظریاتی آدمی تھے جنہوں نے ساری انسانیت کے لیے امن و برابری اور تحمل و برداشت کو فروغ دینے کا درس دیا۔

شہباز شریف نے کہا کہ بابا گرو نانک کی دائمی تعلیمات بشمول انسانیت سے محبت، بے لوث خدمت، بین المذاہب ہم آہنگی نسلوں کو رہنمائی فراہم کر رہی ہے، ان کا اتحاد و یگانگت اور رواداری کا پیغام ایک پرامن اور انصاف پسند دنیا کو قائم کرنے کے لیے مشعل راہ ہے۔

انکا کہنا تھا کہ پاکستان کے لیے یہ باعث فخر ہے کہ بابا گرو نانک دیو جی کی زندگی اور تعلیمات سے متعلقہ متعدد گوردواروں، بالخصوص گوردوارہ جنم آستان ننکانہ صاحب کی حفاظت کر رہا ہے۔

وزیراعظم نے کہا کہ حکومت پاکستان تمام مذہبی اقلیتوں کے حقوق کی حفاظت کا غیر متزلزل عزم رکھتی ہے، اسی عزم کے مطابق حکومت ان تمام مذہبی مقامات کی حفاظت اور خراج عقیدت کے لیے آنے والے زائرین کی رسائی  میں ہر طرح کی سہولت بہم پہنچا رہی ہے۔

انہوں نے کہا کہ پاکستان ہر سال دنیا بھر سے آنے والے سکھ یاتریوں کو ان مقدس مقامات پر خوش آمدید کہتا ہے اور ہر ممکن سہولیات فراہم کرتا ہے۔

شہباز شریف نے مزید کہا کہ آئیے آج کے اس پر مسرت دن کو مناتے ہوئے بابا گرو نانک کے امن و رواداری اور باہمی ہم آہنگی کے پیغامات سے سبق حاصل کرتے ہوئے دنیا کو اتحاد ویگانگت، باہمی عزت اور امن کا گہوارہ بنائیں۔