دل کی صحت سے جڑی ہوئی ہے آپ کی مجموعی صحت، یہی وجہ ہے کہ ماہرین صحت ایسی متوازن غذا کے انتخاب کا مشورہ دیتے ہیں، جو قلب کے لیے مفید ہو۔

اس حوالے سے ڈاکٹر الزبتھ کلوداس، جو ایک ماہر کارڈیالوجسٹ ہیں، کا کہنا ہے کہ دل کی حفاظت کے لیے بہترین غذا جو کہ سادہ اور سستی ہونے کے ساتھ ہر جگہ آسانی سے دستیاب ہے وہ جئی یعنی اوٹس ہے۔

ڈاکٹر کلوداس نے تصدیق کی ہے کہ جئی دل کی صحت کے لیے سب سے فائدہ مند غذاؤں میں سے ایک ہے، یہ کولیسٹرول کو کم کرنے، وزن کو قابو میں رکھنے، اور صحت مند ہاضمہ کو برقرار رکھنے میں مدد کرتا ہے۔ بنیادی طور پر، یہ ایک آسان سا طریقہ ہے جس سے آپ اپنی صحت کا خیال رکھ سکتے ہیں۔

جئی وہ اناج ہے جس پر سب سے زیادہ تحقیق کی گئی ہے، اس میں بیٹا گلوکین نامی حل پذیر فائبر موجود ہوتا ہوتا ہے، جو ہاضمہ کے نظام میں اسفنج کی طرح کام کرتا ہے۔

یہ بھی پڑھیں: یہ عام سی سرگرمیاں آپ کے دل کی صحت کو بہتر بنا سکتی ہیں

یہ فائبر ہاضمہ میں خراب کولیسٹرول ایل ڈی ایل جذب کر کے خون میں پہنچنے سے قبل جسم سے باہر خارج کرنے میں مدد دیتا ہے۔

یہ اس کولیسٹرول کو بھی نکالنے میں مدد دیتا ہے جو پہلے ہی جسم میں موجود ہوتا ہے۔ یہی وجہ ہے اس کا باقاعدگی سے استعمال دل کی صحت کا ضامن ہے۔

جئی کے فوائد صرف کولیسٹرول تک ہی محدود نہیں ہیں۔ چونکہ یہ آہستہ آہستہ ہضم ہوتا ہے اس طرح یہ خون میں شوگر کی سطح کو مستحکم رکھتا ہے، اس طرح یہ آپ کو دیر تک سیر رکھتاہے اور بے وقت کی بھوک سے بچاتا ہے، یہی وجہ ہے کہ وزن کم کرنے کے خواہشمند افراد کے لیے جئی ایک بہترین غذا ہے، یہ ٹائپ 2 ذیابیطس کے خطرے کو بھی کم کرتی ہے۔

جئی کو آسانی روزانہ غذا میں شامل رکھ کر دل کی صحت کے ساتھ مجموعی صحت کو بہتر بنا سکتے ہیں۔