جانی ! کیا آج میری برسی ہے

یعنی! کیا آج مرگیا تھا میں

بیک وقت لفظی جمالیات سے زندگی کی تلخیوں سے لبریز اشعار تخلیق کرنے والے شاعر جون ایلیا وقت گزرنے کے ساتھ ساتھ اپنے پڑھنے والوں کے قریب تر آتے جا رہے ہیں۔

آج کے دن جون ایلیا کو اس دنیا سے بچھڑے 23 برس گزر چکے ہیں لیکن ان کی شاعری کی انفرادیت اب بھی ویسی ہی ہے جیسی ان کی حیات میں تھی۔

جون ایلیا 14 دسمبر 1931 کو امروہہ کے ایک علمی اور ادبی خاندان میں پیدا ہوئے تھے۔ ان کے بھائی رئیس امروہوی بھی نمایاں شاعر تھے اور انہوں نے جنگ اخبار میں روزانہ قطعہ لکھ کر شہرت حاصل کی تھی۔

جون ایلیا نے پہلا شعر صرف آٹھ سال کی عمر میں کہا اور پھر عمر بھر سخن وری کرتے رہے۔ وہ برصغیر ‏میں نمایاں حیثیت رکھنے والے پاکستانی شاعر، فلسفی، سوانح نگار ‏اور عالم تھے، جنہیں انوکھے انداز تحریر کی وجہ سے سراہا جاتا ہے۔

میں جو ہوں جون ایلیا ہوں جناب

اس کا بے حد لحاظ کیجئے گا

1957 میں ہجرت کر کے پاکستان آمد کے بعد کراچی کو اپنا مستقل مسکن بنا لیا اور جلد ہی وہ شہر کے ادبی حلقوں میں مقبول ہو گئے۔ جون کی شاعری ان کے متنوع مطالعے کی عادات کا واضح ثبوت تھی جس کی وجہ سے ان کے کلام کو زبردست پذیرائی حاصل ہوئی۔

جون ایلیا کو ‏عربی، انگریزی، فارسی، سنسکرت اور عبرانی زبانوں میں مہارت ‏حاصل تھی۔ انہیں اقدار شکن، منفرد اور باغی کہا جاتا ہے۔

جو گزاری نہ جا سکی ہم سے

ہم نے وہ زندگی گزاری ہے

جون نے اردو شاعری کو ایک نئی جہت سے روشناس کروایا۔ انہوں نے درد میں ڈوبے کئی شعر کہے اور عشقیہ شاعری میں تو جیسے انہیں کمال حاصل تھا۔

کس لیے دیکھتی ہو آئینہ

تم تو خود سے بھی خوب صورت ہو

شاعری میں انتہائی سادہ الفاظ سے ایک مشکل مضمون کو بیان کرنا ان کا  ایک خاص وصف رہا ہے۔

مستقل بولتا ہی رہتا ہوں

کتنا خاموش ہوں میں اندر سے

جون ایلیا عجز و انکساری، جذبات اور محبت کے شاعر تھے، ان کا اسلوب آج بھی دنیا ئے شعر و ادب میں منفرد مانا جاتا ہے لیکن انہیں اپنا تحریری کام شائع ‏کروانے پر کبھی بھی راضی نہ کیا جا سکا۔

ان کا پہلا شعری مجموعہ ‏’شاید‘ اس وقت شائع ہوا جب ان کی عمر 60 سال کی تھی۔ان کی ‏شاعری کا دوسرا مجموعہ ’یعنی‘ ان کی وفات کے بعد 2003ء میں ‏شائع ہوا اور تیسرا مجموعہ بعنوان ’گمان‘ 2004ء میں شائع ہوا۔

اپنی وفات سے ایک روز قبل کہا گیا جون ایلیا کا آخری شعر پڑھ کر ایسا لگتا ہے کہ جیسے انہیں اپنی موت کا علم پہلے سے ہی ہوگیا تھا۔

جانے کیا واقعہ ہے ہونے کو

جی بہت چاہتا ہے رونے کو

جون ایلیا  8 نومبر 2002ء کو اس دار فانی سے کوچ کرگئے، انہیں کراچی میں واقع سخی حسن کے قبرستان میں سپرد خاک کیا گیا۔