وزیر اعظم  عمران خان نے کہا ہے کہ پارلیمانی سطح پر کیے جانے والوں فیصلوں پر عملدرآمد کرنا اولین ترجیح ہے۔

تفصیلات کے مطابق وزیر اعظم  عمران خان سے اسپیکر قومی اسمبلی اسد قیصرکی ملاقات ہوئی جس میں کورونا وائرس کی موجودہ صورتحال اور وبا کی روک تھام کے لیے حکومتی سطح پر اٹھائے جانے والے اقدامات پر تبادلہ خیال کیا گیا۔

اس موقع پر  اسپیکر قومی اسمبلی اسد قیصرنے وزیر اعظم کو پارلیمانی سطح پر کورونا وائرس کی وبا پر قابو پانے سے متعلق اقدامات سے آگاہ کیا جبکہ کورونا وائرس کی وبا کی روک تھام کے لیے اٹھائے جانے والے حکومتی اقدامات کو سراہا۔

اسپیکر قومی اسمبلی نے کہا کہ کورونا وائرس کی وبا کے پیش نظر پارلیمانی لیڈروں پر مشتمل خصوصی پارلیمانی کمیٹی تشکیل دی گئی ہے جبکہ خصوصی کمیٹی میں پارلیمانی لیڈروں نے وبا پر قابو پانے کے لیے مثبت تجاویز دی ہیں۔

اسد قیصر نے یہ بھی کہا کہ حکومت کے بروقت اقدامات کی بدولت دیگر ممالک کے مقابلے میں پاکستان میں کورونا کی شدت کم ہے۔

اسپیکر قومی اسمبلی اسد قیصرنے وزیر اعظم کو قومی اسمبلی کا اجلاس بلانے سے متلعق امور سے بھی آگاہ کرتے ہوئے کہا کہ قومی اسمبلی کا اجلاس بلانے کے لیے فخر امام کی سربراہی میں تمام پارلیمانی جماعتوں پر مشتمل کمیٹی تشکیل دی گئی ہے۔

کرونا پاکستان سمیت دنیا کیلئے امتحان ہے، وزیراعظم

اس موقع پر وزیر اعظم  عمران خان نے اسپیکر کی جانب سے زائرین اور تبلیغی جماعت کے لیے تشکیل دی جانے والی فنگشنل کمیٹی کے اقدامات کو سراہا۔

ملاقات میں   عمران خان نے کہا کہ پارلیمان قوم کی اجتماعی سوچ کی عکاس ہے جبکہ کورونا وائرس کی وبا پر قابو پانے کے لیے پارلیمان کا کردار انتہائی اہم ہے۔

وزیر اعظم  عمران خان نے مزید کہا کہ حکومت ملک سے کورونا وائرس کے خاتمے کے لئے ہر ممکن اقدامات اٹھا رہی ہے ، ہمیں بحیثیت قوم اس وبا کا مقابلہ کرنا ہے۔

اسپیکر قومی اسمبلی اسد قیصرنے وزیراعظم کی طرف سے قائم کیے گئے کورونا ریلیف فنڈ کو قومی سطح پر پذیرائی کو سراہتے ہوئے کہا کہ ریلیف فنڈ میں پاکستانی قوم کی بھرپور شرکت وزیراعظم پر اعتماد کا اظہار ہے۔