مرکزی ترجمان پاکستان پیپلز پارٹی سینیٹر مولابخش چانڈیو نے کہا ہے کہ سلیکٹڈ بھول جائے کہ وہ پارلیمنٹ اور صوبوں سے اختیارات واپس لے سکتے ہیں کیونکہ اٹھارہویں ترمیم پر کوئی سمجھوتہ نہیں ہوگا۔

تفصیلات کے مطابق مرکزی ترجمان پاکستان پیپلز پارٹی سینیٹر مولابخش چانڈیو نے اپنے ایک بیان میں کہا کہ پیپلز پارٹی پارلیمنٹ اور صوبوں کے اختیارات اور وسائل چھیننے والوں کی راہ میں سب سے بڑی رکاوٹ بن کر کھڑی ہے۔

مرکزی ترجمان پاکستان پیپلز پارٹی سینیٹر نے کہا کہ پارلیمنٹ ،صوبوں کو اختیارات اور این ایف سی کسی نے بھیک میں نہیں دئے، اٹھارہویں ترمیم کی عبارت شہید بی بی، سینکڑوں جیالوں اور جمہوریت پسندوں کے خون سے لکھی گئی

مولابخش چانڈیو نے یہ بھی کہا کہ اٹھارہویں ترمیم آئین ہے، متفقہ آئین جو پارلیمنٹ نے بنایا اس لئے اٹھارہویں ترمیم اور این ایف سی ایوارڈ کو چھیڑنا آئین اور وفاق سے غداری ہوگا

مرکزی ترجمان پاکستان پیپلز پارٹی سینیٹر کا کہنا تھا کہ ہمیں پتا ہے کہ کورونا کی وبا سے توجہ ہٹانے کیلئے ایسے سوشے چھوڑے جا رہے ہیں لیکن صوبے کسی طور پر بھی اپنے حقوق سے دستبردار نہیں ہوں گے۔

خان صاحب یوٹرن لینے کا اپنا رکارڈ خراب نہیں ہونے دیتے ، مولابخش چانڈیو

مولابخش چانڈیو کا یہ بھی کہنا تھا کہ اگر کسی کے دماغ میں ذرہ سا بھی خیال ہے تو وہ نکال دے، اٹھارہویں ترمیم پر بات ہوگی مگر پارلیمنٹ اور صوبوں کی مزید خودمختاری کیلئے ہوگی۔

مرکزی ترجمان پاکستان پیپلز پارٹی سینیٹر نے کہا کہ ہر بحران سے توجہ ہٹانے کیلئے نیا بحران پیدا کرنا عمران خان کا وطیرہ بن چکا ہے، بات ہوگی تو اس آئینی نظام کے مکمل ہونے کی جس کیلئے بھٹو اور بی بی شہید نے قربانی دی۔

 مولابخش چانڈیو نے یہ بھی کہا کہ عمران خان کو یہ سوچ مہنگی پڑے گی ، خان صاحب آپ اپنی معاشی، سیاسی ناکامیوں اور کورونا کے بحران کو چھپانے کیلئے یہ حرکتیں کر رہے ہیں۔

مرکزی ترجمان پاکستان پیپلز پارٹی سینیٹر مولابخش چانڈیو نے مزید کہا کہ خان صاحب کو مفت مشورہ دیتا ہوں کہ کورونا پر توجہ دیں، پارلیمنٹ کو بے اختیار کرنے کا خواب آمر پورا نہ کر سکے آپ تو پھر بھی سلیکٹڈ ہو۔