وزیراعظم کے معاون خصوصی برائے اطلاعات و چیئر مین سی پیک اتھارٹی عاصم سلیم باجوہ نے کہا ہے کہ سی پیک ایک حقیقت ہے اور اس منصوبے میں کوئی رکاوٹ نہیں ہے۔

معاون خصوصی برائے اطلاعات و چیئر مین سی پیک اتھارٹی عاصم سلیم باجوہ نے صحافیوں کے وفد سے گفتگومیں کہا کہ سی پیک کا منصوبہ حقیقی ہے اور اس میں کوئی رکاوٹ نہیں ہے۔

چیئر مین سی پیک اتھارٹی کا کہنا تھا کہ  خنجراب سے گوادر تک کے دونوں روٹس کی تیز رفتار تکمیل کے لیے منصوبہ بندی کر لی ہے، آنے والے چند ماہ میں رہ جانے والے حصوں کی سڑکوں کی تعمیر کے بڑے منصوبےشامل ہیں۔

عاصم باجوہ نے کہا کہ سی پیک قومی منصوبہ ہے،اس کا  دوسرا مرحلہ نہایت اہم اور جلد شروع ہو گا، منصوبے کے دوسرے مرحلے میں زرعی، صنعتی، تجارتی، سائنس و ٹیکنالوجی شعبوں پر توجہ مرکوز ہے۔

انہوں نے کہا کہ  چاروں صوبوں میں اقتصادی زونز فعال کرنا ترجیح ہے ۔ گوادر کی ترقی کے منصوبے بھی دوسرے مرحلے میں شامل ہیں۔ پاک، چین مشترکہ تعاون کمیٹی کا اجلاس جلد منعقد ہو گا۔

معاون خصوصی برائے اطلاعات کا کہنا تھا کہ سی پیک کے تحت تمام خصوصی اقتصادی زونز پر کام تیزی سے جاری ہے، چین، پاکستان میں ” پیسٹ کوکنٹرول سینٹر” قائم کرے گا۔

عاصم سلیم باجوہ کا مزید کہنا تھا کہ  فصلوں کو بیماریوں سے مقابلے کے قابل بنانے کیلئے بیجوں کا معیار بہتر بنایا جائے گا۔

چیئر مین سی پیک اتھارٹی نے کہا کہ   پاکستانی طلباء کے لیے سی پیک میں بڑی خوشخبری پر کام ہو رہے، 20 ہزار پاکستانی طلباء اسکالرشپس پر چین جائیں گے۔اسکالرشپ منصوبے پر بہت پیش رفت ہو چکی، جلد اعلان ہو گا۔

انہوں نے مزید کہا کہ  وزیراعظم عمران خان کے معاون خصوصی برائے اطلاعات کے طور پر اضافی ذمہ داری ملی ہے۔  وزارت اطلاعات اور میڈیا میں بہتری لانے کے لیے اپنی تمام تر صلاحیتوں، تجربے کو بروئے کار لاتے ہوئے بھرپور کوششیں کروں گا۔