نیب نے سابق وزیر اعظم شاہد خاقان عباسی کے خلاف ایل این جی کیس کی تحقیقات میں نئے شواہد سامنے آنے پر عید کے بعد ضمنی ریفرنس دائر کرنے کا فیصلہ کیا ہے۔

نیب نے سابق ایم ڈی پی ایس او شاہد الاسلام کے بیرون ملک مفرور ہونے کی رپورٹ عدالت میں پیش کرتے ہوئے اشتہاری قرار دینے کی استدعا کر دی، کیس کی مزید سماعت 11 جون کو ہو گی۔

احتساب عدالت اسلام آباد کے جج محمد اعظم خان نے ایل این جی ریفرنس کی سماعت کی۔ سابق وزیراعظم شاہد خاقان عباسی بطور ملزم عدالت میں پیش ہوئے۔

نیب کے تفتیشی افسر ملک زبیر نے سابق ایم ڈی پی ایس او شاہد الاسلام سے متعلق رپورٹ پیش کی کہ ملزم جان بوجھ کر بیرون ملک روپوش ہے جس کے ٹھکانے کا پتہ نہیں چل سکا لہذا اشتہاری قرار دینے کی کارروائی شروع کی جائے۔

ان کا کہنا تھا کہ کچھ ریکارڈ کراچی سے نہیں لایا جا سکا۔ نیب کی جانب سے عدالت کو آگاہ کیا گیا کہ ایل این جی کیس کی تحقیقات جاری ہیں اور عبوری ریفرنس دائر کرنے کے بعد کچھ نئے شواہد سامنے آئے ہیں اس لیے عید کے بعد ضمنی ریفرنس دائر کیا جائے گا۔

نیب کے مطابق ضمنی ریفرنس میں شاہد خاقان کے بیٹے اور فیملی کے خلاف ثبوت شامل ہوں گے۔ ایل این جی ٹرمینل ٹھیکے کے بعد شاہد خاقان کی فیملی کے اکاؤنٹس میں اربوں روپے آئے، شاہد خاقان عباسی کے بیٹے عبداللہ خاقان کے بینک اکاؤنٹس میں ٹرانزیکشن کا ریکارڈ بھی پیش کیا جائے گا جس کے اپنے کوئی ذرائع آمدن نہیں تھےمگر ان کے بینک اکاؤنٹ میں بھی رقوم آئیں۔ ریفرنس کی مزید سماعت 11 جون کو ہو گی۔