وزیرِاطلاعات پنجاب فیاض الحسن چوہان نے کہا ہے کہ عوام کو ریلیف دینے اور معیشت کو چلانے کے لیے حکومت اور عدلیہ ایک پیج پر ہیں۔

تفصیلات کے مطابق وزیراطلاعات فیاض الحسن چوہان نے پریس کانفرنس کرتے ہوئے بتایا ہے کہ سپریم کورٹ نے ملک بھر میں شاپنگ مالز کھولنے کے احکامات صادر کیے ہیں۔

اپنے بیان میں فیاض الحسن چوہان نے یہ بھی کہا کہ بزدار حکومت اس سلسلے میں ایس او پیز کو آج حتمی شکل دے دے گی۔

وزیرِ اطلاعات پنجاب فیاض الحسن چوہان نے مزید کہا کہ تمام مارکیٹیں، شاپنگ مالز عدالتی احکامات اور ایس او پیز کی پابندی کے ساتھ کھولے جائیں گے۔

یاد رہے اس سے قبل سپریم کورٹ کی جانب سے تمام شاپنگ مالز کھولنے کا حکم دیتے ہوئے ہفتے اور اتوار کو بھی ملک کی تمام چھوٹی مارکیٹیں اور تمام مالز کھلی رکھنے کی ہدایت کی گئی ہے۔

ملک بھر میں تمام مالز کو بھی کھولنے کا حکم

سپریم کورٹ میں کورونا ازخود نوٹس کیس کی سماعت چیف جسٹس گلزار احمد کی سربراہی میں ہوئی جس میں فیصلہ کیا گیا ہے کہ ملک بھر کے تمام مالز، دکانیں اور بازار کھول دیئے جایئے۔

سماعت کے دوران چیف جسٹس کا کہنا تھا کہ مارکیٹس میں چھوٹے طبقے کا کاروبار ہے اور اگر دکانیں بند کریں گے تو دکاندار تو کورونا کے بجائے بھوک سے مر جائے گا۔

چیف جسٹس کا کہنا تھا کہ چھوٹے دکانداروں کو کام کرنے سے نہ روکیں اور تمام مالز بھی کھولیں کیونکہ مالز میں ایس او پیز پر زیادہ بہتر عمل ہوسکے گا۔