نیب ایگزیکٹو بورڈ  نے وزارت خارجہ کے افسران کے خلاف ریفرنس دائر کرنے کی منظوری دے دی۔

تفصیلات کے مطابق  چیئرمین نیب جسٹس ریٹائرڈ جاوید اقبال کی زیرصدارت نیب  کے ایگزیکٹو بورڈ کا اجلاس ہوا جس میں  ڈپٹی چیئرمین نیب ،پراسیکیوٹر جنرل نیب،ڈی جی نیب سمیت سینئر افسران نے شرکت کی۔

اجلاس میں نیب ایگزیکٹو بورڈ  نے وزارت خارجہ کے افسران کے خلاف ریفرنس دائر کرنے کی منظوری دے دی۔

ملازمین پر جکارتہ میں پاکستانی سفارتخانے کی عمارت خلاف ضابطہ  فروخت کر کے قومی خزانے کو بھاری نقصان پہنچانے کا الزام ہے۔

اس کے علاوہ نیب ایگزیکٹو بورڈ اجلاس میں تین انوسٹیگیشن کی بھی منظوری دے دی گئی ہے۔

اجلاس میں سنیئر جوائنٹ سکریٹری وزارت بین الصوبائی رابطہ عارف ابراہیم کے خلاف  بھی انکوئری کی منظوری دی گئی۔سابق وفاقی وزیر اکرام خان درانی  اور وزارت ہاؤسنگ کے افسران کے خلاف  بھی انکوئری کی منظوری دے دی گئی۔

اس کے علاوہ جاب ٹیسٹنگ سروس انتظامیہ اور دیگر کے خلاف  بھی انوسٹیگیشن کی منظوری دی گئی۔

سابق صدر آصف زرداری کی پولیٹیکل سیکرٹری رخسانہ بنگش کے صاحبزادے عمر منظور کے خلاف  بھی انکوئری کی منظوری دے دی گئی۔

اجلاس میں بتایا گیا کہ  گذشتہ دو سالوں میں لوٹی گئی 178ارب روپے کی رقم بلواسطہ اور بلا واسطہ طور پر بر آمد کرکے قومی خزانہ میں جمع کروائی ہے۔

943 ارب کے 1229ریفرنسز احتساب عدالتوں میں زیر سماعت ہیں۔