معاون خصوصی برائے صحت ڈاکٹر ظفر مرزا کا کہنا ہے عالمی ادارہ صحت کی بہترین حکمت عملی سے کورونا وباء پر بڑی حد تک قابو پالیا ہے ۔

معاون خصوصی برائے صحت ڈاکٹر ظفر مرزا نے ویڈیو لنک پر جنیوا میں  73 ویں  ورلڈ ہیلتھ اسمبلی سے خطاب کرتے ہوئے کہا کہ کورونا وباء پر کوئی بھی ملک اکیلے قابو نہیں پاسکتا ۔

معاون خصوصی برائے صحت کا کہنا تھا کہ  کورونا وباء سے پاکستان سمیت تمام ممالک کو چیلنجز کا سامنا ہے ۔عالمی ادارہ صحت کے رکن ممالک مشترکہ طور پر بہتر طریقے سے اس وبا ءسے نمٹ سکتے ہیں ۔

ڈاکٹر ظفر مرزا نے کہا کہ   آبادی کے لحاظ سے دنیا کا پانچواں بڑا ملک ہونے کے باوجود   پاکستان میں کم کیسز رپورٹ ہوئے ہیں ۔وبا پر قابو پانے کے لئے قومی ایکشن پلان پر سختی سے عملدرآمد کیا جارہا ہے۔

انہوں نے کہا کہ  وفاق  ،صوبے ا ور عسکری ادارے کورونا وائرس سے بچاؤ کے لیے عملی اقدامات  کر رہے ہیں  ۔صحت کے اداروں میں کام کرنے فرنٹ لائینز ہیلتھ ورکرز کو وی کیئر مہم کے تحت  تربیت دی جارہی ہے۔

معاون خصوصی برائے صحت نے مزید کہا کہ  عوام کی آگہی کے لیے میڈیا پر بھر پور مہم جاری ہے ۔عوام کی آگہی کے لئے فوری طور پر ہیلتھ ہیلپ لائن قائم کی گئی  ہے۔ٹریسنگ ،ٹیسٹنگ اینڈ کوارنٹائن کی قومی پالیسی پر عملدرآمد کیا جارہا ہے ۔

ڈاکٹر ظفر مرزا  نے کہا کہ وزیراعظم عمران خان نے عالمی رہنماؤں کے ساتھ ہم آواز ہو کر کورونا وائرس کی مفت ویکسین کی سب لوگوں کو فراہمی  یقینی بنانے پر زوردیا ہے۔

واضح رہے کہ  عالمی ادارہ صحت کی ورلڈ ہیلتھ اسمبلی کی کاروائی تاریخ میں پہلی بار آن لائن ہو رہی ہے۔