صدر ڈاکٹر عارف علوی نے کہا کہ امید ہے کہ ترکی کی جانب سے کورونا وائرس کی عالمی وباء کے چیلنج پر جلد قابو پالیا جائے گا۔

تفصیلات کے مطابق ترکی کے صدر رجب طیب اردوان نے آج صدر مملکت ڈاکٹر عارف علوی کو ٹیلی فون کیا اور صدر عارف علوی اور پوری پاکستانی قوم کو عید الفطر کی مبارک باد پیش کی۔

ترک صدر رجب طیب اردوان نے کراچی میں طیارہ حادثہ میں جاں بحق ہونے والے افراد کے خاندانوں کے ساتھ دلی ہمدردی کا اظہار کرتے ہوئے کہا کہ ترکی مشکل کی ہر گھڑی میں پاکستان کے شانہ بشانہ کھڑا ہے جبکہ صدر عارف علوی نے بھی ترک ہم منصب اور ترک عوام کو عید کی مبارکباد دی۔

صدر مملکت نے پاکستانی شہریوں کی دیکھ بھال پر ترک صدر کا شکریہ ادا کیاجبکہ صدر علوی کا کوویڈ 19 سے نمٹنے کیلئے ترکی کی طرف سے حفاظتی کٹس اور سامان کی فراہمی پر بھی ترک صدر سے اظہار تشکر بھی کیا۔

ٹیلیفونک رابطے پر صدر مملکت نے کراچی میں بد قسمت طیارہ کے حادثہ پر ترک صدر کے اظہار ہمدردی کے پیغام کو بهى سراہا، انہوں نے کہا کہ ترکی کی طرف سے یہ پیغام دونوں ممالک کے درمیان تاریخی اور دیرپا تعلقات کا مظہر اور متاثرہ خاندانوں کیلئے حوصلے اور ہمت کا باعث ہے صدر مملکت نے اس عزم کا اعادہ کیا کہ پاکستان دونوں ممالک کے مابین دیرپا اور بے مثال برادرانہ تعلقات کو مزید مستحکم کرنے کیلئے کردار ادا کرتا رہے گا۔