قومی ایئر لائن کے سی ای او ایئر مارشل ارشد ملک نے کہا ہے کہ طیارے حادثے میں شہید 28 میتوں کی شناخت ہونا باقی ہے۔

تفصیلات کے مطابق پاکستان انٹرنشنل ایئرلائن کے طیارہ حادثے کے معاملہ پر سی ای او پی آئی اے ایئر مارشل ارشد ملک کی بول نیوز سے گفتگو ہوئی جس میں انہون نے بتایا کہ طیارہ حادثے کا شکار 74 مسافروں کی میتوں کی شناخت ہوگئی ہے جبکہ مزید 23 میتوں کی شناخت ہونا باقی ہے۔

سی ای او پی آئی اے نے بات چیت کرتے ہوئے کہا کہ اسلام آباد میں طیارہ حادثے سے متعلق وزیراعظم، صدر پاکستان کو اسلام آباد میں بریفنگ دی جاچکی ہے اور لاہور میں بھی پی آئی اے جہاز حادثے کا شکار فضائی عملے کے اہل خانہ سے خصوصی طور ملاقات بھی کی ہے۔

فرانسیسی ٹیم کی تحقیقات آخری مراحل میں داخل

انہوں نے کہا کہ ملاقات میں اہل خانہ کو طیارہ حادثے کی شفاف تحقیقات اور مدد کا یقین دلایا گیا ہے۔

ایرمارشل ارشد ملک نے بول نیوز سے بات چیت کرتے ہوئے یہ باور کروایا ہے کہ اسلام آباد اور لاہور میں مصروف دن گزارنے کے بعد آج واپس کراچی پہنچوں گا۔

ٰیاد رہے کہ اس  سے قبل وزیراعلیٰ سندھ سید مراد علی شاہ نے کہا ہے کہ طیارہ حادثہ میں جاں بحق ہونے والے 97 مسافروں میں سے 64 کی میتیں لواحقین کودے دی گئی ہیں۔

وزیراعلیٰ نے بتایا کہ25 مسافروں کی شناخت ڈی این اے ٹیسٹ کے ذریعے ہوئی جن کی میتیں لواحقین کے حوالے کی جا چکی ہیں۔

وزیر اعلیٰ کاکہناتھا کہ اس وقت 11 مسافروں کی میتیں  چھیپا کے پاس ہیں جب کہ 22 میتیں ایدھی کے سرد خانے میں ہیں۔

انہوں نے بتایا کہ ایک ڈی این اے ٹیسٹ ابھی میچ ہونا باقی ہے، شناخت کا کام جلد از جلد مکمل کرنے کے لیے کوشاں ہیں، لواحقین کےدکھ اور درد میں برابر کے شریک ہیں۔

خیال رہے کہ گزشتہ ہفتے پی آئی اے کا مسافر طیارہ کراچی میں لینڈنگ سے کچھ دیر قبل رہائشی علاقے ماڈل کالونی میں گر کر تباہ ہو گیا تھا۔