کراچی کے مختلف علاقوں میں بارش ہوئی جس کے بعد موسم انتہائی خوشگوار ہوگیا۔

تفصیلات کے مطابق شہر قائد کے مختلف علاقوں میں ہلکی بارش کے نتیجے میں گرمی کا زور ٹوٹنے لگا، موسم خوش گوار ہوگیا اور شہریوں کے چہرے بھی کھل اٹھے۔

نیوکراچی، سرجانی ٹاؤن، نارتھ کراچی، شادمان ٹاؤن، بفرزون میں ہلکی بارش سے موسم خوش گوار ہو گیا ہے جبکہ نارتھ ناظم آباد، گلشن اقبال، ایف بی ایریا اور اطراف کے علاقوں میں بھی ہلکی بارش کا سلسلہ وقفے وقفے سے جاری ہے۔

سپرہائی وے، اسکیم نمبر 33، گلزار ہجری، سعدی ٹاؤن میں ہلکی بارش ہوئی جبکہ گارڈن، سائٹ ایریا، صدر، لانڈھی، ملیر، ایئرپورٹ، گلشن حدید میں بھی بارش کا سلسلہ وقفے وقفے سے جاری ہے۔

محکمہ موسمیات کے مطابق کراچی کا موجودہ درجہ حرارت 31 ڈگری سینٹی گریڈ ریکارڈ کیا گیا ہے جبکہ شہر قائد میں مزید بارش کا امکان ہے۔

ملک بھر میں بارش سے گرمی کا زور ٹوٹ گیا

یادرہے کہ  بلوچستان کے شمالی علاقوں میں بھی ہلکی بارش سے موسم سہانا ہو گیاتاہم میدانی علاقے خشک موسم کی لپیٹ میں رہے۔

گذشتہ 24 گھنٹوں کے دوران بالائی اور وسطی پنجاب۔ بالائی خیبر پختونخوا۔ بالائی سندھ ۔ شمال مشرقی بلوچستان۔کشمیر اور گلگت بلتستان کے کئی علاقوں میں تیز ہواوں اورگرج چمک کے ساتھ بارش ہوئی۔

ملک بھر میں  رم جھم برسات کی جھڑی لگ گئی اور خیبر پختونخو  اور پنجاب  کے مختلف اضلاع میں آندھی اورگرج چمک کے ساتھ بارش ہوئی ہے۔

واضح رہے کہ پاکستان کے کئی علاقوں میں تیز ہواوں اورگرج چمک کے ساتھ بارش ہوئی اور آج سب سے زیادہ درجہ حرارت  تربت میں 44 ڈگری سینٹی گریڈ ریکارڈ کیا گیا۔