پاکستان کے ٹاپ کراٹیکا سعدی عباس کا کہنا ہے کہ پاکستان میں کرکٹ کے علاوہ کسی کھیل کو کوئی نہیں پوچھتا۔

ایک بیان میں سعدی عباس کا کہنا تھا کہ صوبائی حکومت ہو یا وفاقی حکومت یا پھر نجی کمپنیاں، کرکٹ کے علاوہ کسی پر پیسہ لگانے کو کوئی تیار نہیں، پاکستان میں کرکٹ کے علاوہ کسی اور کھیل سے وابستہ ایتھلیٹس کو کوئی نہیں پوچھتا کہیں فنڈنگ کیلئے جاتے ہیں تو یوں لگتا کہ بھیک مانگ رہے ہیں۔

انہوں نے پاکستان میں دیگر کھیلوں سے وابستہ کھلاڑیوں کا حال بیان کیا اور جذباتی انداز میں کہا کہ اگر یہی حال رہا تو کھلاڑی کیسے محنت کریں گے؟

سعدی عباس ایشین اور کامن ویلتھ کراٹے چمپئن شپ میں گولڈ میڈلز جیتنے والے پاکستان کے ٹاپ کراٹیکا ہیں۔

انہوں نے مزید کہا کہ جو کرکٹ پر کروڑوں روپے خرچ کرتے ہیں، وہ کسی اولمپک کوالیفائرز پر 15،20 لاکھ کی اسپا نسرشپ پر بھی تیار نہیں ہوتے۔

سعدی عباس نے کہا کہ اگر وہ کرکٹر ہوتے تو زندگی کافی مختلف ہوتی، پاکستان سے نہیں بھی کھیلتے تو لیگز اور دیگر ایونٹس کھیل کر اچھا پیسہ بنالیتے۔

اُن کا کہنا تھا کہ جب انہوں نے کیریئر اسٹارٹ کیا تو اپنی جیب سے پیسے خرچ کرکے دبئی سے پاکستان آتے تھے اس وقت ساتھی ایتھلیٹس کہتے تھے کہ کیوں اپنی جیب سے خرچہ کررہے ہو۔

سعدی عباس نے بتایا کہ دنیا کی ٹیمیں جب ٹورنامنٹس میں شرکت کے لیے جاتی ہیں تو کھلاڑیوں کے لیے سارا بندوبست کیا جاتا ہے، ہوٹلز بہترین ہوتے ہیں، کوچز ہوتے ہیں، ڈاکٹرز ہوتے ہیں جبکہ ہماری ٹیم کے دوروں میں پیسے بچانے کی کوشش کی جاتی ہے۔