وزیرِ اطلاعات پنجاب فیاض الحسن چوہان نے کہا ہے کہ وزیرِ اعظم عمران خان اس سکینڈل کی رپورٹ کے فرانزک آڈٹ اور ملزمان کے خلاف کاروائی پر مبارکباد کے مستحق ہیں۔

تفصیلات کے مطابق وزیرِ اطلاعات پنجاب فیاض الحسن چوہان نے اپنے بیان میں کہا کہ ملکی تاریخ میں پہلی بار کسی حکومت نے اپنے دورِ اقتدار کے مالی سکینڈل کے لیے تحقیقاتی کمیشن کی رپورٹ پیش کی ہے۔

 فیاض الحسن چوہان نے کہا کہ وزیرِ اعظم عمران خان کی ہدایات پر 29 ارب کی سبسڈی کا معاملہ نیب کو بھیجا جا رہا ہے جبکہ اس کے علاوہ گزشتہ 20 سے 25 سال میں دی گئی سبسڈیز پر بھی نیب کو ریفرنس بھیجا جاۓ گا۔

وزیرِ اطلاعات پنجاب نے یہ بھی کہا کہ اسمیں پی ٹی آئی کے ایک سالہ دورِ حکومت کو بھی شامل کیا گیا ہے، خود احتسابی کی اس سے بہتر مثال گزشتہ کسی دورِ حکومت میں نظر نہیں آتی۔

فیاض الحسن چوہان کا کہنا تھا کہ سیلز و انکم ٹیکس کی مد میں کارپوریٹ فراڈ اور بے نامی ٹرانزیکشنز کا معاملہ ایف بی آر کو سونپا گیا ہے جبکہ فیک ایکسپورٹس دکھا کر سبسڈی بٹورنا، اور بیرون ملک سے رقوم منگوا کر حلال کرنے کو سٹیٹ بنک تفتیش کرے گا۔

وزیرِ اطلاعات پنجاب فیاض الحسن چوہان کا مزید کہنا تھا کہ حکومت ریاست کے اندر کسی قسم کے کارٹیل بناۓ جانے کی اجازت نہیں دے گی ، تمام حکومتی ادارے 90 دن میں اپنی تحقیقات اور کاروائیاں کریں گے جبکہ حکومتی تحقیقاتی اداروں کی استعداد کار اور ریفارمز پر بھی حکومت کی نظر ہے۔