وزیرخارجہ شاہ محمود قریشی نے کہا ہے کہ اورسیز پاکستانیوں نے ہر مشکل وقت میں پاکستان کی مدد کی ان کے جائز مطالبات کو حل کرنا ہماری ذمہ داری ہے۔

تفصیلات کے مطابق وزیر خارجہ شاہ محمود قریشی نے متحدہ عرب امارات میں مقیم پاکستانی کمیونٹی کے ساتھ ویڈیو لنک کے ذریعے ٹاؤن ہال اجلاس کی صدارت ہوا ۔

اجلاس میں متحدہ عرب امارات میں مقیم پاکستانی سفیر غلام دستگیر خان نے  وزیر خارجہ کو کورونا وبا کے تناظر میں یو اے ای میں پاکستانی کمیونٹی کی صورت حال کے حوالے سے تفصیلی بریفنگ دی ۔

غلام دستگیر خان نے کہا کہ دوبئی اور ابوظہبی میں مقیم پاکستانی کمیونٹی کا بھرپور خیال رکھا جا رہا ہے متحدہ عرب امارات کی طرف سے ، کرونا وبا کے پھیلاؤ کو روکنے کیلئے لاک ڈاؤن سمیت مختلف اقدامات اٹھائے جا رہے ہیں اور بہترین طبی سہولیات فراہم کی جا رہی ہیں۔

 اس موقع پر شاہ محمود قریشی نے کہا کہ مجھے احساس ہے کہ یو اے ای میں ہماری 1.6 ملین کمیونٹی ہے اتنی بڑی کمیونٹی کی توقعات پر پورا اترنا مشکل کام ہے۔

وزیرخارجہ نے یہ بھی کہا کہ اورسیز پاکستانیوں نے ہر مشکل وقت میں پاکستان کی مدد کی ان کے جائز مطالبات کو حل کرنا ہماری ذمہ داری ہے مجھے یقین ہے کہ آپ نے اس کٹھن گھڑی میں تندہی سے کام کیا ہے اور  196 پاکستانیوں کیلئے فری ٹکٹس دلائے جو بہت احسن اقدام ہے۔

 شاہ محمود قریشی کا کہنا تھا کہ آج دنیا تبدیل ہو چکی ہے سوشل میڈیا لمحہ لمحہ کی خبر دے رہا ہے آپ کو جدید ذرائع کو بروئے کار لانا ہو گا۔

وزیرخارجہ کا یہ بھی کہنا تھا کہ ہماری پارٹی کے استحکام میں بیرون ملک مقیم پاکستانیوں کا بڑا حصہ ہے ہماری درآمدات کورونا کی وجہ سے بہت کم ہو چکی ہیں لیکن زرمبادلہ کے حوالے سے ابھی ہمیں توقعات وابستہ ہیں۔

ہماری پہلی ترجیح وطن واپسی کے منتظر، پاکستانیوں کی واپسی ہے، وزیرخارجہ

شاہ محمود قریشی نے کہا کہ یہ پاکستانی، اپنا خون پسینہ بہا کر اپنا زرمبادلہ بھجوا رہے ہیں اور پاکستان کی معیشت کو سہارا دئیے ہوئے ہیں ہمیں اپنا مائنڈ سیٹ اور رویہ تبدیل کرنا ہو گا۔

وزیرخارجہ نے خطاب میں واضح کیا کہ جن لوگوں کے ویزوں کی مدت ختم ہو چکی ہے یو اے ای میں ہمارا سفارت خانہ ان کی معاونت ترجیحی بنیادوں پر کر رہا ہے ،میری خواہش ہوگی کہ پاکستانی کمیونٹی کھل کر صورتحال کے حوالے سے اور سفارت خانے کے کردار کے حوالے سے کھل کر اظہار خیال کریں۔

شاہ محمود قریشی نے یہ بھی کہا کہ 209 سے زیادہ ممالک اور ریاستیں اس کورونا وبا کا نشانہ بن چکے ہیں کورونا وبا کے دوران ،متحدہ عرب امارات سمیت دنیا بھر میں پاکستانی ڈاکٹروں بالخصوص امریکہ اور برطانیہ میں جو کردار ادا کیا ہے ۔

وزیرخارجہ شاہ محمود قریشی نے مزید کہا کہ میں جلد یو اے کے وزیر خارجہ سے بات کروں گا اور ان سے گذارش کروں گا کہ  موجودہ غیر معمولی حالات کے پیش نظر، اس کمیونٹی سینٹر کو فوری طور پر کھولا جائے ۔

اجلاس میں سیکرٹری خارجہ سہیل محمود ،اسپیشل سیکرٹری خارجہ معظم علی خان اور وزارت خارجہ کے سینیئر افسران بھی اجلاس میں شریک ہوئے۔