شادی سے انکار کی ویسے تو بہت سی وجہ سنی لیکن بھارتی ریاست اتر پردیش کی رہائش پزیر لڑکی نے ایک انوکھی وجہ کی بنیاد پر آخری وقت میں شادی سے ہی انکار کر دیا ۔

مقامی رپورٹ کے مطابق ریاست اُترپردیش کےعلاقے بریلی میں شادی کی تقریب میں رسومات جاری تھیں کہ اسی دوران دلہا نے دلہن کو ہار پہنانے کے بعد خوشی کا اظہار کرتے ہوئے ناگن ڈانس شروع کیا اور ڈانس کرنا دلہا کو اس قدر مہنگا پڑا کے اس ناگن ڈانس نے نئے رشتہ میں جڑنے والے جوڑے کی خوشیوں کو ہی نگل لیا۔

یاد رہے دلہا کے ڈانس کرنے کے عمل کو دلہن نے غیر مناسب قرار دیتے ہوئے عین موقع پر شادی سے انکار کردیا۔

دلہن کے جانب سے انکار کے فیصلہ پر دلہا نے دلہن کے منہ پر تھپڑ مار دیا جس کے بعد معاملہ بگڑتا ہی گیا اور بات ہاتھا پائی تک پہنچ گئی اور انہیں منتشر کرنے کے لیے پولیس کو مداخلت کرنا پڑی۔

میڈیا سے گفتگو کرتے ہوئے دلہن کے بھائی کا کہنا تھا کہ تقریب میں دلہا کا رویہ نامناسب تھا، رسومات کے دوران جو کچھ بھی ہوا وہ کسی صورت قابل قبول نہیں، بہن کے انکار کرنے کے بعد رشتے داروں اور برادری نے شادی نا توڑنے پردباؤ ڈالا مگر بھائیوں نے بہن کے ساتھ کھڑے ہونے کو ترجیح دی۔

پولیس افسر وپن سنگھ کا کہنا تھا کہ ہمیں شادی میں حالات خراب ہونے کی اطلاع موصول ہوئی جس کے بعد نفری کو وہاں بھیج کر معاملات طےکیے گئے۔

واضح رہے کہ دلہا نے تحریری طور پر لکھ کر دیا کہ وہ جہیز کا سامان 14 نومبر تک واپس کردے گا۔