سال 2021 کے آغاز سے ہی دنیا بھر میں کورونا ویکسینیشن نے ایک نیا انقلاب برپا کردیا تھا جس کے بعد دنیا بھر میں کورونا سے بچاؤ کے لئے ویکسینیشن کو عام کردیا گیا تھا اور یہ سلسلہ آج بھی جاری ہے۔

کورونا سے بچاؤ کے لئے لگائی جانے والی ویکسین پر نئی تحقیق ہوتی رہتی ہیں جس کے نتیجے میں بہت سے نئے اور معلوماتی انکشاف بھی ہوتے ہیں۔

اس حوالے سے ایک اور تحقیق سامنے آئی سے جس کے نتائج سے معلوم ہوتا ہے کہ ویکسینیشن کرانے کے بعد لوگوں کو تناؤ کا کم سامنا ہوتا ہے اور ذہنی صحت میں بہتری آتی ہے۔

اس تحقیق کے لئے  امریکا بھر میں 8 ہزار سے زیادہ افراد کو سروے فارم بھیجے گئے تھے تاکہ وباء سے ذہنی صحت پر مرتب ہونے والے اثرات کا جائزہ لیا جاسکے۔

ابتدائی نتائج کے بعد محققین کی جانب سے ہر 2 ہفتے بعد ان افراد کو سروے فارم بھیج کر ذہنی صحت میں آنے والی تبدیلیوں کو دیکھا گیا۔

اس ڈیٹا کی بنیاد پر یہ تخمینہ بھی لگایا کہ ممکنہ طور پر ویکسینیشن کے بعد 10 لاکھ افراد کی ذہنی پریشانی میں کمی آئی۔

ڈیٹا سے عندیہ ملتا ہے کہ کووڈ 19 سے بچاؤ کے لیے ویکسینیشن کرانا محض لوگوں کو بیماری سے ہی تحفظ فراہم نہیں کرتا بلکہ ایسا کرنا بیماری کے شکار ہونے کے ذہنی ڈر اور بے چینی کو بھی نمایاں حد تک کم کرتا ہے۔

خیال رہے کہ یہ تحقیق سدرن کیلیفورنیا یونیورسٹی میں ڈیٹا بیس شواہد کی بنیاد پر پر کی گئی ہے۔