بھارت میں ایک مالک مکان کا اپنی خاتون کرایہ دار کو زیرجامہ تحفے میں دینا مہنگا پڑگیا۔

بھارت کے شہر بینگالورو میں 42 سالہ اسکول ٹیچر نے ایک مالک مکان پر الزام عائد کیا ہے کہ اس نے مجھے 42ویں سالگرہ کے موقع پر زیر جامہ تحفے میں دیے اور پھر وہ پہن کر سامنے آنے کا مطالبہ بھی کیا۔

بھارتی پولیس کے مطابق ہمارے پاس اسکول ٹیچر کی جانب سے شکایت درج کروائی گئی ہے کہ میرے مالک مکان نے مجھے ہراساں کرنے کی کوشش کی ہے اور سالگرہ پر زیر جامہ تحفے میں دینے کے بعد مجھے کہا کہ ہم ساتھ گھومنے چلتے ہیں اور تم یہی پہن کر آنا اور پھر مجھے دکھانا۔

خاتون نے تفصیلات بتاتے ہوئے کہا کہ میں 12 سال سے اسی مکان میں کرایہ دار ہوں اور اسکول میں پڑھاتی ہوں لیکن ایسا پہلی بار میرے ساتھ ہوا، جب مجھے مالک مکان کی جانب سے تحفہ ملا تو میں بہت خوش ہوئی جو ایک باکس کی شکل میں تھا لیکن جیسے ہی میں نے باکس کھولا تو میں حیرت زدہ رہ گئی۔

اسکول ٹیچر خاتون نے الزام عائد کیا کہ میرے مالک مکان نے غیر ازدواجی تعلقات قائم کرنے کے لیے بھی کہا اور مجھے مسلسل فون پر تنگ کرتا رہا، یہاں تک کہ جب میں نے بات ماننے سے انکار کردیا تو ایک دن مجھے گھر میں بند کرکے باہر سے تالا لگادیا۔

پولیس کے مطابق ہم نے معاملے کی تحقیقات کا آغاز کردیا ہے لیکن ہمیں ابتدائی تفتیش میں یہ پتہ چلا ہے کہ مالک مکان اور خاتون میں مکان خالی کرانے سے متعلق کئی سالوں سے مسئلہ چل رہا ہے لیکن خاتون مکان خالی کرنے پر راضی نہیں ہے تاہم خاتون کی یہ بات سچ ثابت ہوئی ہے کہ انہیں ایک رات گھر میں بند کرکے باہر سے تالا لگا دیا گیا تھا۔

پولیس نے مزید بتایا کہ ہم خاتون ٹیچر ہراساں کرنے کے معاملے کی چھان بین کررہے ہیں اور اگر اس میں سچائی ثابت ہوئی تو ملزم کو قانون کے مطابق سزا دی جائے گی۔