اسپتال انتظامیہ کی بڑی غفلت سامنے آئی ہے جہاں نومولود بچے کی لاش 13 ماہ سے اسپتال کے مردہ خانے میں موجود ہے جس کی وہ تدفین کرنا بھول گئے تھے۔

کویت میں ایک انتہائی افسوس ناک واقعہ سامنے آیا جہاں اسپتال انتظامیہ مردہ خانے میں ایک بچے کی لاش کی تدفین کرنا بھول گئی۔

خبر رساں ادارے کے مطابق گزشتہ برس کویت میں کورونا کے باعث لگائے گئے مکمل لاک ڈاؤن کے دوران ایک جوڑے کے ہاں مردہ بچے کی ولادت ہوئی تھی۔

والد نے بتایا کہ 13 ماہ قبل میری بیوی نے مردہ بچے کو جنم دیا، اس وقت کورونا وائرس کی وبا کی وجہ سے کرفیو نافذ تھا جس پر اسپتال انتظامیہ نے کہا کہ ہم مردہ بچہ آپ کو نہیں دے سکتے  لیکن متعلقہ ادارے کے تعاون سے خود ہی تدفین کردیں گے۔

بچے کے والد  نے کہا کہ 13 ماہ بعد پتہ چلا کہ بچے کی تدفین ابھی تک نہیں ہوئی اور اس کی لاش اسپتال کے مردہ خانے میں ہی موجود ہے۔

واقعے کے بعد جب اسپتال انتظامیہ سے رابطہ کیا گیا تو انہوں نے ہچکچاہٹ کے بعد جواب دیا کہ ’’ہم بچے کو دفنانا بھول جانے پر معذرت خواہ ہیں‘‘۔

اسپتال کی لاپرواہی اور غفلت پر کویت میں سوشل میڈیا صارفین نے ہیش ٹیگ ’’بچہ اسپتال کے سردخانے میں‘‘ مہم شروع کی اور اسپتال کے خلاف مقدمہ درج کردیا گیا۔