دنیا کا سب سے بڑا اور نایاب 555.55 قیراط کا سیاہ ہیرا 31 لاکھ 60 ہزار برطانوی پاؤنڈز(42 لاکھ 80 ہزار ڈالرز) میں نیلامی میں فروخت کر دیا گیا۔

اس ہیرے کے متعلق مانا جاتا ہے کہ جب 2.6 سے 3.8 ارب سال قبل زمین پر ایک سیارچہ گِرا تھا تو یہ وجود میں آیا تھا۔ اگرچہ اس مقابلے میں ایک نظریہ یہ پیش کیا جاتا ہے کہ ممکن ہے یہ خلاء سے آیا ہو۔

’اینِگما‘ نامی یہ ہیرا، ہیکس نامی کرپٹوکرنسی کے بانی رچرڈ ہارٹ نے لندن میں سودبی کی ایک آن لائن نیلامی میں خریدا۔

رچرڈ ہارٹ نے ٹوئٹ کیا کہ میں نے دنیا کا سبس ے بڑا ہیرا ہمارے #HEXican کلچرل ہیریٹج کے لیے جیت لیا۔

انہوں نے مزید لکھا کہ اس کو HEX.com ہیرا کہا جائے گا۔ اس کا وزن 555.55 قیراط ہے اور اس کے 55 پہلو ہیں۔ آپ تمام #HEXicans کو مبارک ہو۔

یہ ٹکڑا ہیرے کے لیے انتہائی بھاری ہے جس کا وزن 111.11 گرام کے برابر ہے اور یہ زمین پر ڈائنو سار سے پہلے سے موجود ہے۔

یہ ایک کاربناڈو ہے جو انتہائی نایاب چٹان ہے اور صرف برازیل اور وسطی افریقی رپبلک میں دریافت ہوئی ہے اور یہ قدرتی ہیرے کی سب سے سخت قسم ہے۔

ان کے متعلق یہ مانا جاتا ہے کہ ان کا وجود خلاء سے ممکن ہوا کیوں کہ ان میں اوسبومائٹ نامی منرل ہوتا ہے جو صرف شہابِ ثاقب میں پایا جاتا ہے لیکن ان کی مخصوص جڑیں پُر اسراریت میں چُھپی ہوئی ہیں۔