پیشگوئیوں کے لیے مشہور متنازع کارٹون “سمپسنز” کے بعد ایک اور کارٹون سیریز “فیملی گائے” کی پیشگوئیاں بھی سوشل میڈیا پر وائرل ہونے لگی ہیں۔

“فیملی گائے“ کی ایک قسط 2009 میں نشر کی  گئی، جس میں روسی صدر کے حوالے سے موجودہ دور کی خبروں کی پیش گوئی کی گئی تھی۔

اب اس قسط کی جس کی ویڈیو سوشل میڈیا پر وائرل ہو رہی ہے۔

موجودہ حالات میں مغرب کی جانب سے روسی صدر پر الزام عائد کیا جا رہا ہے کہ وہ یوکرین کے ساتھ جنگ کے درپے ہیں اور کشیدگی کم کرنے کے دعوؤں پر عمل کرنے میں ناکام رہے ہیں۔

تاہم، ایسی ہی صورتحال کی بھرپور عکاسی فیملی گائے سیزن 8 کی قسط “Spies Reminiscent of Us“ کے وائرل کلپ میں کی گئی ہے۔

Putin's Ukraine Strategy pic.twitter.com/Uqd25hHRDc

— Mohammed Soliman (@ThisIsSoliman) February 16, 2022

ویڈیو میں دکھایا گیا ہے کہ روسی صدر ملاقات کے لیے آنے والے افراد کو ہتھیار نما مختلف اشیا سے خوفزدہ کرنے کی کوشش کررہے ہیں۔

پہلے وہ اپنے کوٹ سے ایک فولڈنگ چھڑی نکالتے ہیں، پھر اسے ہینگر میں تبدیل کرکے اس پر اپنا کوٹ لٹکا دیتے ہیں۔

اس کے بعد وہ تیر کمان (ایروگن) نکال کر ایک تیر چلاتے ہیں  جو مہمانوں  کو لگنے کے بجائے دیوار میں پیوست ہوجاتا ہے اور پیوٹن اس تیر پر اپنا کوٹ لٹکا دیتے ہیں۔

اس  کے بعد پیوٹن کلاشنکوف نکال کر ٹرگر دباتے ہیں، جس میں سے گولی کے بجائے آگ نکلتی ہے جس سے وہ اپنی سگریٹ جلاتے ہیں۔

اس کلپ کو سوشل میڈیا پر ”پیوٹن کی یوکرین سے متعلق حکمت عملی“ کے کیپشن کے ساتھ شیئر کیا جارہا ہے۔

یاد رہے کہ روسی صدر ولادیمیر پیوٹن نے رواں ہفتے کہا تھا کہ روس نے دونوں ملکوں میں تناؤ کا سبب بننے والے فوجی دستوں کو یوکرین کی سرحد سے واپس بلانا شروع کر دیا ہے۔

انہوں نے مزید کہا تھا کہ وہ یورپ میں جنگ نہیں چاہتے۔

تاہم مغربی ممالک کا کہنا ہے کہ روس کے اقدامات اس کے دعوؤں کے خلاف ہیں۔

وزیر اعظم بورس جانسن کا کہنا ہے کہ صورتحال پر تازہ ترین حساس معلومات حوصلہ افزا نہیں ہیں۔