باراتیوں کو کھانا دیر سے پیش کرنے پر دولہا ناراض ہوگیا اور شادی سے ہی انکار کر دیا۔

بھارت میں شادیوں کے دوران عجیب و غریب اور دلچسپ واقعات اکثر سامنے آتے رہتے ہیں کہیں شادی کے دوران مٹن نہ کھلانے پر دلہا ناراض ہو کر بارات واپس لے گیا اور دوسری لڑکی سے شادی کرلی۔

تو کہیں دلہا سسرال والوں کے خلاف مقدمہ درج کروانے پولیس اسٹیشن پہنچ گیا کہ اسکی شادی  ایک مخنث سے کروائی گئی ہے۔

کہیں ایک عاشق نے شادی کے منڈپ پر ڈرامائی انٹری دیکر دلہن کی مانگ میں سندور بھردیا جب اس کی محبوبہ کسی اور سے شادی کر رہی تھی جس پر سب نے عاشق کی درگت بنادی۔

تو کہیں دلہن صبح کی تقریبات ختم ہونے تک بہت تھکی ہوئی تھی اور رسومات کے درمیان ہی سوگئی۔

اسی طرح کا ایک اور دلچسپ واقعہ بہار کے پورنیہ علاقے سے سامنے آیا جہاں دولہے نے شادی کرنے سے انکار کر دیا جب اسے اور اس کے رشتہ داروں کو کھانا دیر سے دیا گیا۔

معاملہ اتنا بگڑ گیا کہ اس نے دلہن کے رشتہ داروں سے ملنے والے تمام تحائف بھی واپس کر دیے اور وہاں سے چلا گیا۔

بارات مقررہ وقت پر پنڈال میں پہنچ گئی تاہم شادی کی تقریبات کے دوران دولہے کے اہل خانہ کو کھانا کھلانے میں تاخیر ہوئی۔

اس کے بعد دولہا اور اس کے والد اس قدر ناراض ہوئے کہ انہوں نے شادی کی تقریب کو آگے بڑھانے سے انکار کرتے ہوئے واپس جانا شروع کر دیا۔

مقامی لوگوں اور پنچایت نے دونوں فریقوں کے درمیان معاملہ سلجھانے کی کوشش کی لیکن کوئی فائدہ نہیں ہوا۔

دولہے کے والد اس بات پر سخت ناراض تھے کہ ان کے خاندان والوں کو کھانا اتنی دیر سے پیش کیا گیا، اس نے دلہن کے خاندان کو کھانا پکانے کے لیے آنے والے اخراجات، موٹر سائیکل اور دولہے کو ملنے والا دیگر تمام سامان دے دیا۔

واقعے کے بعد دلہن کی والدہ نے دولہا اور اس کے والد کے خلاف قصبہ پولیس اسٹیشن میں شکایت درج کرائی ہے اور معاملے کی تحقیقات کی جارہی ہے۔