بھارتی ریاست بہار کے علاقے گوپال گنج میں ایک حیران کن واقعہ پیش آیا ہے، جہاں چار سالہ بچے کو ڈسنے والا زہریلا کوبرا تڑپ تڑپ کر مر گیا، لیکن بچہ معجزاتی طور پر محفوظ رہا اور پوری طرح صحت مند ہے۔

آپ نے وہ مشہور کہاوت “جسے اللہ رکھے اُسے کون چکھے” تو سنی ہی ہوگی، لیکن اسے اپنی آنکھوں کے سامنے سچ ہوتا دیکھ کر لوگ حیران ہیں۔

یہ پورا واقعہ صرف 30 سکینڈ کے درمیان پیش آیا، سانپ کے کاٹنے کے بعد زندہ بچنے والے خوش نصیب بچے اور مرے ہوئے سانپ کو دیکھنے کے لیے لوگوں کی بھیڑ جمع ہوگئی۔

بھارتی ذرائع ابلاغ کے مطابق برولی تھانہ علاقے کے مادھوپور گاؤں کے رہائشی روہت کمار کا چار سال کا بیٹا انوج اپنے ماموں کے گھر چکائے کوٹ تھانہ علاقے کے ساسا موسا کھجوری ٹولہ میں آیا ہوا تھا۔

بدھ کی شام انوج گھر کے دروازے کے سامنے بچوں کے ساتھ کھیل رہا تھا۔ اس دوران ایک کوبرا کھیتوں کی طرف سے تیزی سے آیا اور کھیل رہے انوج کے پاؤں میں کاٹ لیا۔

سانپ کے کاٹتے ہی وہاں موجود بچے خوفزدہ ہوکر بھاگ کھڑے ہوئے۔ وہاں موجود لوگوں کی نظر سانپ پر پڑی تو وہ لاٹھی ڈنڈے لے کر بچے کو بچانے اور سانپ کو مارنے کے لیے دوڑے، مگر تب تک کوبرا تڑپ تڑپ کر اپنی جان دے چکا تھا۔

سانپ کے مرنے کے بعد بچہ انوج وہیں پر کھیلنے لگا۔ اہل خانہ اس کو فوری طور پر صدر اسپتال کے ایمرجنسی وارڈ لے کر پہنچے، جہاں ڈاکٹروں نے علاج شروع کیا۔

ڈاکٹر نے بتایا کہ بچہ پوری طرح صحت مند ہے اور اس کو کوئی خطرہ نہیں ہے۔

بچے کے اہل خانہ مرے ہوئے کوبرا سانپ کو بھی ڈبے میں رکھ کر اسپتال لے گئے تھے، تاکہ ڈاکٹر کو سانپ کی شناخت میں پریشانی نہ ہو اور بچہ کا صحیح علاج ہو سکے۔

اسپتال میں پانچ فٹ لمبے مردہ سانپ کو دیکھ کر ہر کوئی حیران تھا ۔ بہرحال زہریلا کوبرا معصوم بچے کو کاٹنے کے بعد کیسے مرا، یہ ایک معمہ بن گیا ہے۔