اکثر ہم دیکھتے ہیں کہ جس گھر میں میت ہوتی ہے وہاں کے لوگ اپنے پیاروں کو کھونے کی وجہ سے روتے ہیں اور شاید یہ بات بہت عام بھی ہے لیکن کیا آپ نے کبھی یہ سنا ہے کہ جس گھر میں میت ہو وہاں کے لوگ خوشی سے میت کے ساتھ تصویر بنواتے ہیں۔

اس خبر میں آج ہم آپکو ایک ایسے خاندان کے بارے میں بتائیں گے کہ جس نے میت کے ساتھ تصویر بنوائی اور سوشل میڈیا پر بھی شیئر کردی۔

بھارتی میڈیا رپورٹس کے مطابق یہ تصویر ریاست کرناٹک کے ایک گاؤں سے سامنے آئی جس میں ایک خاندان نے اپنی رشتے دار 95 سالہ خاتون ‘ماری اما’ کی آخری رسومات پر باقاعدہ تصویر کھنچوائی۔

تصویر میں دیکھا جاسکتا ہے کہ میت تابوت میں ہے اور میت کے چاروں طرف ہر عمر کے 41 لوگ موجود ہیں جو مسکرا رہے ہیں جیسے یہ کوئی عام تصویر ہو۔

اس حوالے سے خاتون کے بیٹے نے اپنے جاری کردہ بیان میں کہا کہ لوگ اس تصویر کا مطلب نہیں سمجھ سکے یہ ان کے لیے ہے جو کسی کے مرنے کے بعد آنسو بہاتے ہیں ہمارا ماننا ہے کہ خوشی سے انہیں اگلے سفر کے لیے روانہ کیا جائے اسی لیے ہم نے ایسا کیا۔

ان کا کہنا تھا کہ موت افسوسناک ہوتی ہے لیکن ہوسکتا ہے موت کے بعد والی زندگی زیادہ خوبصورت ہو، میری والدہ نے زندگی کی 95 بہاریں دیکھیں اور وہ ان میں خوشی سے رہیں۔

واضح رہے کہ مرنے والی خاتون “ماری اما” کے 9 بچے ہیں جبکہ ان کے 19 نواسے نواسیاں اور پوتے پوتیاں ہیں۔