آج سے 110 سال قبل بحری تاریخ کا ایک ایسا ناقابل فراموش حادثہ پیش آیا جسے سن کر آج بھی لوگوں کے رونگٹے کھڑے ہوجاتے ہیں۔

ہارلینڈ اینڈ وولف کمپنی کے تیار کردہ ٹائی ٹینک نامی بحری جہاز کو  اس وقت کا پرتعیش ترین اور دنیا کا محفوظ ترین (یہاں تک کہ کبھی نہ ڈوبنے والا ) جہاز قرار دیا گیا تھا ۔

تاہم یہ بحری جہاز اپنے پہلے ہی سفر میں ایک برفانی تودے سے ٹکراکر ڈوب گیا تھا جس میں 1500 سے زائد افراد ہلاک ہوئے تھے۔

اب ٹائی ٹینک  کے ڈوبنے کے 110 سال بعد اس  کے ملبے کی ایک نئی ویڈیو سامنے آئی ہے جو ریزولوشن کے اعتبار سے اپنی نوعیت کی پہلی اور اب تک کی سب سے بہترین ویڈیو ہے۔

یہ ویڈیو اوشین گیٹ ایکسپیڈیشنز نامی ایک کمپنی کی جانب سے دو روز قبل یعنی 30 اگست کو جاری کی گئی ہے۔

اوشین گیٹ ایکسپیڈیشنز ایک ایکسپلوریشن کمپنی ہے جو لوگوں کو زیر سمندر ٹائی ٹینک کے ملبے اور دنیا بھر کے دیگر گہرے سمندری مقامات کی مہم جوئی کرواتی ہے۔

کمپنی کا کہنا ہے کہ اس فوٹیج میں ٹائی ٹینک کی کچھ بالکل نئی خصوصیات اور ’غیر معمولی‘ تفصیل دکھائی گئی ہے۔

ٹائی ٹینک پر تحقیق کرنے والے  ایک ماہر  غوطہ خور رائے گولڈن نے کہا کہ اس فوٹیج میں وہ تفصیلات ہیں جو اس سے پہلے کبھی جہاز پر نہیں دیکھی تھیں۔