ٹائی ٹینک کا قصہ تو سبھی نے سنا ہوا ہے کہ ٹائی ٹینک اپریل 1912 میں سفر کے دوران برف کے تودے سے ٹکرانے کے بعد ڈوب گیا تھا۔

لیکن کیا آپ جانتے ہیں کہ ریناٹا نامی خاتون نے ٹائی ٹینک کا ملبہ دیکھنے کیلئے2 کروڑ روپے خرچ کر دیے؟

جی ہاں! حال ہی میں ٹائی ٹینک کے ملبے کی سیر کرنے والی خاتون نے اپنا خواب پورا کیا ہے، ریناٹا نامی خاتون نے صرف اس تجربے کے لیے 2 کروڑ روپے سے زیادہ خرچ کیے۔

  ریناٹا نامی خاتون کا کہنا ہے کہ ملبے کو دیکھنے کی خواہش اس وقت شروع ہوئی جب میں کالج کی طالبہ تھی، میں نے سائنس کی تعلیم حاصل کی اور سمندری علوم کا انتخاب کیا، اس امید پر کہ میں اس تاریخی جہاز کا ملبہ تلاش کرنے والی پہلی انسان بنوں گی۔

انہوں نے کہا کہ میری بدقسمتی یہ ہے کہ اس کا ملبہ پہلے ہی مل گیا لیکن ٹائی ٹینک کو بہت قریب سے دیکھنے کی خواہش پھر بھی تھی جس کے لیے میں نے زندگی میں بڑی قربانیاں دی ہیں۔

خاتون کا کہنا تھا کہ میں نے تیس سال تک اس کے لیے پیسے جمع کیے، میں نے ابھی تک شادی نہیں کی یہ تمام فیصلے اس لیے کیے کیونکہ مجھے ٹائی ٹینک کو دیکھنا تھا۔

انہوں نے کہا کہ ہم آبدوز کے ذریعے دو گھنٹوں سے زیادہ دیر تک سفر کر کے سمندر کی تہہ تک پہنچے، جیسے ہی ہم قریب پہنچے تو ہمیں کوئلے کے ٹکڑے نظر آئے، یہ وہ کوئلہ تھا جو جہاز ڈوبنے کے بعد باہر بکھر گیا تھا۔

 ریناٹا کا کہنا تھا کہ ٹائی ٹینک کو دیکھنے کے بعد اب میں خود کو مکمل محسوس کر رہی ہوں اور میرا اس سفر پر جانا بہت ضروری تھا۔

 واضح رہے کہ ٹائی ٹینک اپریل 1912 میں اپنے سفر کے دوران برف کے تودے سے ٹکرانے کے بعد ڈوب گیا تھا اور اس میں تقریباً بائیس سو مسافر اور عملے کے ارکان سوار تھے۔