اکثر سوشل میڈیا پر ایسی ویڈیوز دیکھنے کو ملتی ہیں جس کو دیکھ کر انسان ہنسنے پر مجبور ہو جاتا ہے اور کچھ ویڈیوز ایسی ہوتی ہیں جو انسان کو حیران کردیتی ہیں۔

حال ہی میں مصر میں ایک پُل کی تصاویر اور ویڈیوز سوشل میڈیا پر خوب وائرل ہو رہی ہیں جس نے صارفین کی بھرپور توجہ حاصل کی ہوئی ہے۔

تصاویر میں پُل کی حیرت انگیز اونچائی کے حوالے سے لوگوں کی مختلف آرا سامنے آرہی ہیں۔

سوشل میڈیا صارفین نے اپنی رائے کا اظہار کرتے ہوئے کہا کہ اس پُل پر گاڑی کو چڑھانا کسی خطرے سے کم نہیں کیونکہ ذرا سے بے احتیاطی کسی بھی حادثے کا سبب بن سکتی ہے۔

ہم آپ کو بتاتے چلیں کہ مصر میں قائم یہ ایک عام پل ہے جسے “سمیرا موسیٰ پل” کہا جاتا ہے اور یہ ان نئے منصوبوں میں شامل ہے جنہیں نئی جدت اور تیز رفتاری سے مکمل کیا جا رہا ہے۔

اس کے علاوہ یہ “سمیرا موسیٰ پل” جو چار پلوں کے سنگم پر واقع ہے فیلڈ مارشل طنطاوی کی سڑک پر تیار کیا گیا ہے۔

تاہم اس پُل کی حقیقت یہ ہے کہ اس کی کچھ تصاویر قریبی زاویوں سے لی گئی تھیں اور پھر فوٹو شاپ پروگراموں کے ذریعے اس میں کچھ ترمیم کی گئی جس کے بعد یہ دیکھنے میں بہت اونچا پُل دکھائی دیتا ہے جبکہ ایسا کچھ نہیں۔

انجینیر انور امین جو سمیرا موسیٰ پُل کے لیے ایگزیکیوٹنگ کمپنی کے ڈائریکٹر ہیں نے ایک ٹیلی ویژن انٹرویو میں کہا کہ اسے رنگ روڈ کے متوازی ڈیزائن کیا گیا تھا۔

ان کا کہنا تھا کہ پُل 10 لین پر مشتمل ہے اور اس کی مکمل اونچائی 27 میٹر ہے،  یہ پُل ٹریفک کو جنوب کی سمت سے قاہرہ منتقل کرتا ہے، یہ پُل روٹ نمبر ایک، روٹ نمبر تین، سویز روڈ اور مقطم کے علاقے کو ملاتا ہے۔