آج کل جسے دیکھو وہ انٹرنیٹ کے ذریعے پیسے کمانے میں مصروف ہے۔

بات کی جائے بھارت کی تو وہاں گاؤں دیہات کے لوگ یوٹیوب سے پیسہ کما رہے ہیں جبکہ کئی لوگ اس کام سے راتوں رات کروڑ پتی بھی بن گئے ہیں۔

بھارتی ریاست چھتیس گڑھ کے ایک چھوٹے سے گاؤں کی ایک تہائی آبادی کا ذریعہ معاش ہی یوٹیوب ہے اور ان کے چینلز پر لاکھوں سبسکرائبرز موجود ہیں جس سے وہ ماہانہ لاکھوں روپے کما رہے ہیں۔

اسی حوالے سے بھارت کا تلسی نامی گاؤں دنیا بھر میں یوٹیوب ویلیج کے نام سے جانا جانے لگا ہے، اس چھوٹے سے دیہی علاقے میں یوٹیوبر کو ویڈیو بنانے کے لیے جو کاوش کی جاتی ہے وہ کہیں اور نہیں کی جاتی۔

اس کی وجہ یہ ہے کہ اس گاؤں کی ایک تہائی آبادی بطور پیشہ ویڈیوز بنا کر یوٹیوب پر اپلوڈ کردیتی ہے، گاؤں کی خواتین بھی اپنا یوٹیوب چینل بنا رہی ہیں جس کی وجہ سے ان کے لیے بھی معاشی طور ایک نئی راہ کھل گئی ہے۔

تین ہزار آبادی والا یہ گاؤں جس کے زیاد تر باشندے پہلے کسان تھے اور صبح سویرے اپنی فصلوں پر کھیتی باڑی کیلئے جایا کرتے تھے لیکن گاؤں کے دو نوجوانوں کی یوٹیوب پر کامیابی کے بعد سب کی توجہ اس جانب ہوگئی۔

یوٹیوب ولیج کی یہ کہانی دو دوستوں گیانیندرا شکلا اور جئے ورما کے ساتھ شروع ہوئی تھی جنہوں نے گاؤں میں پہلی مرتبہ یوٹیوب پر ویڈیوز بنا کر کامیابی حاصل کرنے کے بعد انجینئر اور ٹیچر کی ملازمتوں کو خیرباد کہہ دیا تھا۔