آج ہم آپکو ایسے شخص کے بارے میں بتائیں گے جو کئی سالوں سے گردن میں گولی پھنسے رہنے کے باوجود صحت مند زندگی گزار رہا ہے۔

یہ حیرت انگیز واقعہ چین میں سامنے آیا جہاں 95 سالہ شخص گزشتہ 7 دہائیوں سے گردن میں بندوق کی گولی پھنسے رہنے کے باوجود صحت مند زندگی گزار رہا ہے، 77 سال سے گردن میں گولی موجود ہونے کا اس شخص کو کبھی پتا نہ چلا۔

غیر ملکی میڈیا رپورٹس کے مطابق سابق چینی فوجی زاؤ گزشتہ دنوں گھر کی بالکونی سے نیچے گرے۔

اس وقت تو انہیں کوئی درد محسوس نہیں ہوا لیکن بعد ازاں گردن میں تکلیف کے باعث گھر والے انہیں ڈاکٹر کے پاس لے گئے۔

اسپتال پہنچنے پر ڈاکٹر نے مریض کا ایکسرے کرانے کا مشورہ دیا، ایکسرے سے معلوم ہوا کہ زاؤ کی گردن میں بندوق کی ایک پرانی گولی پھنسی ہوئی ہے۔

95 سالہ زاؤ نے ڈاکٹروں کو بتایا کہ میں نے نوعمری میں چینی فوج میں شمولیت اختیار کی تھی اور دو جنگیں لڑیں۔

ان کا کہنا تھا کہ دوسری جنگ عظیم کے دوران جاپانی فوجیوں کے خلاف جنگ کے دوران مجھے متعدد چوٹیں آئیں لیکن مجھے گردن میں گولی لگنے کے بارے میں کچھ یاد نہیں ہے۔

زاؤ نے کہا کہ انہیں صرف اتنا یاد ہے کہ 1944 میں جنگ کے دوران ایک زخمی ساتھی کو دریا کے پار لے جاتے ہوئے وہ شدید زخمی ہوئے تھے جبکہ ان کے جسم پر چھروں کے نشانات موجود ہیں۔

ان کا کہنا تھا کہ اس لیے انہوں نے خود اندازہ لگایا ہے کہ یہ گولی شاید دریا پار کرتے ہوئے ہی گردن میں لگی تھی۔

انہوں نے کہا کہ گولی مبینہ طور پر ناک کی بائیں جانب سے اندر گئی اور اوپری جبڑے پر سوراخ کرتی ہوئی گردن میں داخل ہونے سے پہلے دانتوں سے باہر نکل گئی تھی۔

ایکسرے کا معائنہ کرنے کے بعد ڈاکٹروں نے زاؤ اور ان کے اہلِ خانہ کو بتایا کہ گولی خون کی کچھ بڑی شریانوں کے قریب ہے اور چونکہ اس سے زاؤ کو اب تک کوئی پریشانی نہیں ہوئی اس لیے اسے گردن میں چھوڑ دینا ہی بہتر ہے۔

زاؤ کا کہنا ہے کہ گزشتہ 7 دہائیوں سے صحت مند زندگی گزار رہا ہوں لہٰذا اب اس گولی کو نکالنے کی کوئی وجہ نہیں ہے۔