بھارت میں نجی کمپنی کے سینیئر نائب صدر نے اپنی نومولود بیٹی کے ساتھ وقت گزارنے کے لیے اچھی تنخواہ والی نوکری ہی چھوڑ دی۔

بھارتی میڈیا رپورٹس کے مطابق حال ہی میں انکت جوشی نامی شخص نے اپنے دیے گئے ایک انٹرویو میں بتایا کہ بیٹی کی پیدائش کے بعد اس کے ساتھ قیمتی وقت گزارنے کے لیے انہوں نے نوکری سے استعفیٰ دے دیا ہے۔

ان کا کہنا تھا کہ کچھ ماہ قبل ہی میں نے ایک کمپنی میں بحیثیت سینیئر نائب صدر کے طور پر نوکری شروع کی اور اس دوران میری بیٹی کی پیدائش ہوگئی تو میں نے ایک ہفتے کی چھٹی لی۔

انہوں نے بتایا کہ لیکن مجھے احساس ہوا کہ اپنی اولاد کے ساتھ وقت گزارنے کے لیے یہ چھٹی بہت کم ہے اور آفس والے میری چھٹی مزید بڑھائیں گے نہیں اس لیے میں نے نوکری ہی چھوڑنے کا فیصلہ کیا۔

جوشی نامی کے مطابق کافی لوگوں نے اس فیصلے پر مستقبل کے حوالے سے مجھے ڈرانے کی کوشش کی۔

ان کا کہنا تھا کہ لیکن میری نوکری ایسی تھی کہ مجھے دوسرے شہروں کا دورہ کرنا ہوتا تھا اور میں نہیں چاہتا تھا کہ میں یہ وقت اپنی بیٹی کے ساتھ گزارنے کے بجائے سفر میں گزاردوں، اس لیے میں نے نوکری چھوڑی۔

انہوں نے کہا کہ گزشتہ ایک ماہ سے نومولود بیٹی کے ساتھ وقت گزارنے اور لوری سنانے کے باوجود اب بھی میرا دل نہیں بھرا اور میں اس سے زیادہ وقت اپنی بیٹی کے ساتھ گزارنا چاہتا ہوں اس لیے کچھ ماہ اور میرا نوکری تلاش  کرنے کا کوئی ارادہ نہیں ہے۔