بھارت کے ایک سرکاری اسپتال کی کھدائی کے دوران ایسی قدیم دریافت ہوئی جس نے دیکھنے والوں کو حیران کردیا۔

بھارتی میڈیا کی شائع کردہ رپورٹ کے مطابق مہاراشٹرا کے شہر ممبئی کے ایک پرانے سرکاری اسپتال کے احاطے میں ایک قدیمی سرنگ کا انکشاف ہوا۔

بھارتی حکوم نے اس بات کی تصدیق کی کہ سر جے جے اسپتال کے احاطے میں برطانوی دور اقتدار میں تعمیر کی گئی 132 سال پرانی سرنگ دریافت ہوئی ہے۔

رپورٹ میں بتایا گیا ہے کہ اسپتال کی ڈین ڈاکٹر پلاوی ساپلے نے میڈیا کو بتایا کہ تقریباً 200 میٹر لمبی سرنگ کا سنگ بنیاد 1890 میں رکھا گیا ہوگا کیونکہ اس کی دیوار پر اس کی تاریخ بھی درج ہے۔

انہوں نے بتایا کہ بدھ کے روز اسپتال کے ایک رہائشی میڈیکل آفیسر ارون راٹھوڈ معمول کے مطابق گشت پر تھے کہ اس دوران ان کی نظر نرسنگ کالج کی دیوار کے قریب ایک سوراخ پر پڑی جس کو مزید کھودنے پر سرنگ دریافت ہوئی۔

Maharashtra | A 132-year-old tunnel has been discovered at the govt-run JJ Hospital in Mumbai’s Byculla. Built in the British Era, the 200-metre-long tunnel was found under the building of a medical ward (04.11) pic.twitter.com/RuNv2rbggP

— ANI (@ANI) November 5, 2022

ڈاکٹر پلاوی ساپلے نے بتایا کہ جس عمارت کے نیچے اینٹوں کی دیواروں والی سرنگ دریافت ہوئی ہے وہ ماضی میں ​​سر ڈی ایم پیٹ اسپتال برائے خواتین اور بچوں کا تھا، جسے مارچ 1892 میں بائیکلہ کے وسیع و عریض اسپتال کیمپس میں تعمیر گیا تھا۔

ڈاکٹر کے مطابق یہ عمارت فی الوقت ایک نرسنگ کالج میں تبدیل ہوگئی ہے، نیز چند برسوں قبل بھی اس عمارت میں ایک سرنگ کی قیاس آرائیاں کی جا رہی تھیں لیکن اسے تلاش کرنے کے لیے کوئی سرکاری ریکارڈ یا نقشہ موجود نہیں تھا۔

اسپتال کے حکام نے مزید تحقیقات کے لیے ممبئی کے کلکٹریٹ اور آثار قدیمہ کے محکموں کو تمام تفصیلات فراہم کر دی ہیں جس سے مزید معلومات حاصل ہونا متوقع ہے۔

واضح رہے کہ سرکاری ریکارڈ کے مطابق ایک پارسی مخیر شخص سر جے جے کے قطعہ اراضی اور ان کی جانب سے کیے گئے عطیہ کے سببب مذکورہ اسپتال کی بنیاد 3 جنوری 1843 کو رکھی گئی تھی، اس سرنگ کی دریافت پر پتھر پر جس تاریخ کا اندارج ہے اس پر 1890 تحریر کیا گیا ہے جو اس بات کی نشاندہی کرتی ہے کہ سرنگ کی تعمیر بعد میں عمل میں آئی۔