اسمارٹ فون میں وائی فائی انٹرنیٹ اسپیڈ سست ہونے کی نئی وجہ سامنے آگئی ہے۔

وائی فائی راؤٹر کا استعمال ہر گھر میں ہوتا ہے اور کبھی وائی فائی کے سگنلز اتنے آہستہ ہو جاتے ہیں کہ موبائل میں نیٹ چلنا بند ہو جاتا ہے۔

جب بھی نیٹ کا مسئلہ ہوتا ہے کہ تو ہم فوراً نیٹ والے کو فون کرتے ہیں لیکن کبھی یہ نہیں سوچتے کہ کیا پتا مسئلہ ہماری طرف سے ہو۔

  آج ہم آپ کو ایسی چیزوں کے بارے میں بتانے والے ہیں جن کی وجہ سے ہمارے وائی فائی کے سگنلز آہستہ ہو جاتے ہیں۔

راؤٹر کی پوزیشن ٹھیک نہ ہونا

فون میں وائی فائی انٹرنیٹ اسپیڈ سست ہونے کی ایک بڑی وجہ راؤٹر کی غلط پوزیشن ہوتی ہے۔

دیواروں اور دروازوں کے قریب یا فرش پر رکھنے سے وائی فائی سگنل متاثر ہوتے ہیں۔

اسی طرح اگر راؤٹر دور جیسے سب سے آخری کمرے میں رکھا گیا ہے تو اس سے بھی انٹرنیٹ اسپیڈ متاثر ہوتی ہے۔

ایسی صورت میں راؤٹر کی پوزیشن بدل کر دیکھیں کہ وائی فائی کوریج کس حد تک بہتر ہوئی ہے۔

ایک وائی فائی نیٹ ورک چینل کے زیادہ صارفین

اگر کسی وائی فائی نیٹ ورک چینل کو زیادہ افراد استعمال کر رہے ہیں تو اس سے بھی فون پر انٹرنیٹ کی رفتار سست ہو جاتی ہے۔

بیشتر راؤٹرز آپ کے لیے مخصوص چینل منتخب کرتے ہیں تاہم اگر پڑوس کا وائرلیس نیٹ ورک بھی وہی چینل استعمال کررہا ہو تو سگنل متاثر ہوسکتے ہیں۔

ایک اچھا راؤٹر خودکار طور پر ان حالات میں چینل بدلنے کی کوشش کرتا ہے مگر پرانے یا سستے راؤٹر پہلے سے متعین چینل تک محدود رہتے ہیں۔

تو یہ محسوس ہو کہ آٹو سیٹنگ فائدہ مند نہیں تو راؤٹر کے ایڈمنسٹریٹر انٹرفیس میں جاکر خود چینل کو بدل دیں۔

دیگر ڈیوائسز کی مداخلت

سب سے عام وائرلیس ٹیکنالوجی 802.11 (وائرلیس جی) 2.4 گیگا ہرٹز فریکوئنسی پر کام کرتی ہے، متعدد وائرلیس مصنوعات جیسے مائیکرو ویو اوون کی فریکوئنسی بھی یہی ہوتی ہے، جس کے نتیجے میں ڈیوائس اور راؤٹر کے درمیان مداخلت ہوتی ہے۔

اس سے بچنے کے لیے اگر آپ ڈوئل بینڈ راؤٹر استعمال کررہے ہیں تو اسے 2.4 سے 5 گیگا ہرٹز پر سوئچ کردیں۔

5 گیگا ہرٹز سے نہ صرف انٹرنیٹ اسپیڈ بہتر ہوگی بلکہ دیگر وائرلیس نیٹ ورکس اور ڈیوائسز سے سگنل میں مداخلت بھی کم ہوجائے گی، کیونکہ اس فریکوئنسی کو زیادہ عام استعمال نہیں کیا جاتا۔

آپ کسی سست نیٹ ورک سے کنکٹ ہیں

وائی فائی سست ہونے کی ایک اور بڑی وجہ کسی سست نیٹ ورک سے فون کو کنکٹ کرنا ہے۔

گھر میں فلموں کو اسٹریم کرنے، ویڈیو گیمز ڈاؤن لوڈ کرنے یا دیگر اپ ڈیٹس کے نتیجے میں مجموعی انٹرنیٹ کی رفتار متاثر ہوتی ہے۔

اس نیٹ ورک سے کنکٹ ہونے پر اسمارٹ فونز پر بھی انٹرنیٹ اسپیڈ سست ہوتی ہے۔

آپ کا فون ہی سست ہے

فون میں انٹرنیٹ کی سست رفتار کئی بار کسی سست فون کی نشانی بھی ہوتی ہے۔

ہوسکتا ہے کہ وائی فائی کنکشن کی رفتار اچھی ہو، موبائل ڈیٹا کوریج بھی بہترین ہو مگر آپ کا فون اس رفتار کا ساتھ دینے سے قاصر ہو۔