بھارت میں ایک ہی درخت سے 300 اقسام کے آم کی پیداوار حاصل کر کے بزرگ نے سب کو حیران کر دیا ہے۔  

حال ہی میں بھارتی شہر لکھنؤ میں ایک 82 سالہ شہری کلیم اللہ خان نے آم کے ایک ہی درخت سے 300 اقسام کے آم کی پیداوار حاصل کر لی ہے۔

کلیم اللہ نے لکھنؤ کے چھوٹے سے قصبے ملیح آباد میں موجود اپنے باغ میں کہا کہ ’ کئی دہائیوں سے آم کے درخت کی پرورش کی، تاکہ پھل کی سیکڑوں اقسام پیدا کی جا سکیں ‘۔

انہوں نے کہا کہ ’ 9 میٹر (30 فٹ) لمبے درخت کی عمر 120 سال ہے، وہ اس درخت کو دیکھنے کے لیے روزانہ ایک میل کا فاصلہ طے کرتے ہیں، جس سے وہ گزشتہ برسوں میں آم کی تین سو سے زائد اقسام پیدا کر چکے ہیں ‘۔

82-year-old Indian mango grower, Kaleem Ullah Khan, has produced hundreds of different mango varieties from the same tree, which he has been working on since 1987 🥭 pic.twitter.com/RYl2vAkA4l

— Al Jazeera English (@AJEnglish) February 19, 2023

کاشت کار کلیم اللہ خان نے کہا کہ ’ یہ کئی دہائیوں تک چلچلاتی دھوپ میں سخت محنت کرنے کا میرا انعام ہے، آنکھوں کے لیے یہ صرف ایک درخت ہے، لیکن اگر آپ اپنے دماغ سے دیکھیں تو یہ ایک درخت، ایک باغ اور دنیا کا سب سے بڑا آم کا کالج ہے ‘۔

کلیم اللہ نے کہا کہ ’ جب یہ کام شروع کیا تو ابتدا میں انہوں نے آموں کے نام بالی ووڈ اداکاراؤں کے نام پر رکھنا شروع کیے، ایک آم کا نام انہوں نے ’ایشوریہ‘ بھی رکھا، یہ ان کے تیار کردہ بہترین آموں میں سے ایک تھا ‘۔

انہوں نے کہا کہ ’ یہ آم اتنا ہی خوب صورت تھا جتنا کہ اداکارہ، ایک آم کا وزن ایک کلو گرام سے زیادہ تھا، اس کی بیرونی جلد کی رنگت سرخی مائل تھی، اور اس کا ذائقہ بہت میٹھا تھا ‘۔

واضح رہے کہ کلیم اللہ نے نو عمری میں اسکول چھوڑ دیا تھا اور اسی عمر میں انہوں نے آم کی نئی اقسام بنانے کے لیے پودوں کے حصوں کو پیوند کرنے کا پہلا تجربہ کیا، اُس وقت انہوں نے 7 نئے قسم کے پھل پیدا کرنے کے لیے ایک درخت کی پرورش کی، لیکن وہ طوفان میں ضائع ہو گیا۔

 پھر 1987 سے انہوں نے آم کے ایک درخت کی پرورش شروع کر دی، جو اب ان کا فخر اور خوشی بن چکا ہے، اور اس سے انہوں نے ہر قسم کے ذائقے، ساخت، رنگ اور سائز کا آم حاصل کیا۔