چینی خاتون نے اپنی ہی بیسٹ فرینڈ کے گھر سے 4 کروڑروپے کی چوری کیلئے منفرد طریقہ اپنایا لیکن 12 سال قید کی سزا اس کا مقدر بن گئی۔

بین الاقوامی ذرائع ابلاغ کے مطابق دھوکہ دہی اور فراڈ کا یہ معاملہ تین سال قبل شروع ہوا تھا جب کاؤ نامی خاتون نے اپنے گھر کی تزئین و آرائش کے لیے چابی اپنی دوست لیو کو دی تھی اور وہ خود کام کے سلسلے میں شہر سے باہر گئی ہوئی تھی۔

لیو نے دوست کی غیر موجودگی میں اس کے گھر سے ایک ملین یو آن (  پونے 4 کروڑ روپے) مالیت کے برانڈڈ بیگز، جوتے، کپڑے، جیولرز اور دیگر قیمتی اشیا چرا کر ان کی جگہ ہو بہو نقلی اشیا رکھ دیں۔

کاؤ جب واپس لوٹی تو چند ہی دنوں میں انہیں اندازہ ہوگیا کہ بعض اشیا جعلی یا نقلی ہیں لیکن اس نے سمجھا کہ شاید ایسا دکاندار نے کیا ہے لیکن جیسے جیسے دیگر اشیا کا بھی معلوم ہوتا گیا تو وہ تشویش میں مبتلا ہوگئی۔

یہ بھی پڑھیں: چوہے نے ہیرے کا ہار چوری کرلیا؛ ویڈیو سوشل میڈیا پر وائرل

کاؤ نے جن دکانوں سے یہ سامان لیا تھا وہاں شکایت کی تو ان اشیا کو دیکھنے کے بعد دکانداروں نے بتایا کہ یہ سامان ان کے دیے گئے سامان کی نقل ہیں،یہ سامان آپ کے گھر میں ہی تبدیل کیا گیا ہے۔

تاہم کاؤ کو اپنی دوست لیو پر مکمل بھروسہ تھا اور وہ سمجھتی رہی کہ یہ کارستانی شاید گھر میں کام کے لیے آنے والے مزدوروں کی ہے لیکن جلد ہی پولیس نے اس معمہ کو حل کرلیا۔

تفتیش کے دوران لیو نے اعتراف جرم کرلیا اور اپنی دوست سے معاف کردینے کی درخواست کی لیکن کاؤ نے انکار کردیا۔

عدالت نے لیو کو 12 سال قید کی سزا سنادی۔