ہوائی جہاز میں سفر کرنے کو عموماً محفوظ سمجھا جاتا ہے لیکن کبھی کبھار یہ بھی حادثات کا شکار ہوجاتے ہیں اور مسافروں کے بچنے کے امکان انتہائی کم ہوتے ہیں۔

اس حوالے سے حال ہی میں کی گئی ایک تحقیق سے یہ بات سامنے آئی ہے کہ ہوائی جہاز کی کچھ سیٹیں ایسی ہوتی ہیں، جن پر بیٹھے مسافروں کے بچنے کا امکان دوسروں کی نسبت زیادہ ہوتا ہے اور یہ وہ سیٹیں ہوتی ہیں جنہیں لوگ عموماً پسند نہیں کرتے۔

آسٹریلیا کی سنٹرل کوئنزلینڈ یونیورسٹی کے پروفیسر اور ایوی ایشن کے ماہر ڈوگ ڈرورے نے تحقیق میں گزشتہ 35سال کے دوران ہوائی جہازوں کو پیش آنے والے حادثات میں مسافروں کی اموات کے ڈیٹا کا تجزیہ کرکے مذکورہ نتائج اخذ کیے ہیں۔

ایوی ایشن کے ماہر ڈوگ ڈرورے کا کہنا ہے کہ ’ طیارے کے وسط میں موجود درمیانی راستے کے ساتھ والی سیٹوں پر بیٹھے مسافروں کی حادثے کی صورت میں موت ہونے کی شرح 44فیصد ہوتی ہے جبکہ جہاز کے آخری حصے میں درمیان والی سیٹوں پر بیٹھے مسافروں میں یہ شرح 28فیصد ہوتی ہے ‘۔

انہوں نے کہا کہ ’ ہوائی جہاز کے حادثے میں مسافروں کے زندہ بچ جانے کا امکان حادثے کی نوعیت پر منحصر ہوتا ہے تاہم جہازکی سیٹوں کے لحاظ سے بھی اس امکان میں کمی و بیشی ہوتی ہے۔

  ڈوگ ڈورے  نے کہا کہ ’جہاز کے اگلے حصے کی تمام سیٹیں دوسرے نمبر پر سب سے زیادہ خطرناک ہوتی ہیں، ان پر بیٹھے مسافروں کی حادثے کی صورت میں موت ہونے کی شرح 39فیصد ہوتی ہے ‘۔

ایوی ایشن کے ماہر ڈوگ ڈرورے کا کہنا ہے کہ ’ جہاز کے وسطی حصے میں درمیانی اور ونڈو سیٹوں پربیٹھے مسافروں کے مرنے کی شرح 38فیصد اور پچھلے حصے کی تمام سیٹوں پر 32فیصد ہوتی ہے، سوائے بالکل آخری میں درمیانی راستے کے ساتھ والی چند سیٹوں کے، ان سیٹوں پر بیٹھے مسافروں کی موت ہونے کی شرح سب سے کم 28فیصد ہوتی ہے ‘۔