آپ میں سے اکثر لوگوں نے طیارے پر سفر کیا ہو گا لیکن کیا آپ نے کبھی غور کیا کہ جہاز کی کھڑکی کے نچلے حصے میں ایک ننھا سوراخ موجود ہوتا ہے؟

اگر نہیں تو آج ہم آپ کو بتاتے ہیں کہ طیاروں کی کھڑکیوں میں ایک ننھا سوراخ ہوتا ہے جس کا مقصد خوبصورتی میں اضافہ کرنا نہیں بلکہ یہ سوراخ لوگوں کو محفوظ رکھنے میں مدد فراہم کرتا ہے۔

سطح زمین سے بلندی بڑھنے سے سانس لینے کے لیے آکسیجن کی مقدار کم ہو جاتی ہے اور آکسیجن کی کمی سے بیماری یا موت کا خطرہ بڑھتا ہے۔

طیارے عموماً 10 ہزار فٹ یا اس سے زائد بلندی پر پرواز کرتے ہیں اور اتنی بلندی پر آکسیجن ماسک کے بغیر سانس لینا ناممکن ہوتا ہے۔

یہی وجہ ہے کہ طیاروں کے کیبن کو خصوصی طور پر پریشرائزڈ بنایا جاتا ہے تاکہ مسافر اور عملہ معمول کے مطابق سانس لے سکے۔

ایسا طیاروں کے انجنوں سے کیبن تک ہوا پہنچا کر کیا جاتا ہے اور جب کیبن کا اندرونی دباؤ مناسب ہو جاتا ہے تو ہوا کے بہاؤ کو مستحکم رکھا جاتا ہے۔

تو اس دباؤ کے ذریعے انسانوں کو تو نقصان سے بچانے میں مدد ملتی ہے مگر ایسا طیاروں کے لیے مفید نہیں ہوتا۔

یہی وجہ ہے کہ اس دباؤ کے اخراج کے ایک ذریعے کی ضرورت ہوتی ہے اور وہ ذریعہ کھڑکیوں پر موجود ننھے سوراخ ہوتے ہیں۔