یہ تو سب ہی نے سنا ہوگا کہ محبت میں لوگ اندھے ہوجاتے ہیں یا پاگل ہوجاتے ہیں یا کچھ بھی کرنے کے لئے تیار ہوتے ہیں لیکن ایک واقعے نے سب کو حیران کردیا ہے۔

حال ہی میں بھارت کے ایک شہر میں عجیب و غریب واقعہ پیش آیا جہاں لڑکی کا روپ دھارے ایک لڑکا اپنی محبوبہ کی جگہ امتحان دینے پہنچ گیا۔

7 جنوری کو، بابا فرید یونیورسٹی آف ہیلتھ سائنسز کی جانب سے کوٹکپورہ کے ڈی اے وی پبلک اسکول میں ہیلتھ ورکرز کا امتحان لیا گیا جس دوران فاضلکا سے تعلق رکھنے والے انگریز سنگھ نے اپنی گرل فرینڈ پرمجیت کور کا روپ دھار کر امتحان دینے کا فیصلہ کیا۔

اس مقصد کے لئے لڑکے نے خواتین کا سوٹ پہنا جس کے ساتھ بندی، لپ اسٹک اور سرخ چوڑیاں بھی پہنی تھیں۔ مزید یہ کہ اس نے اپنی محبوبہ کی جانب سے امتحان میں شرکت کے لیے جعلی ووٹر اور شناختی دستاویزات کا استعمال بھی کیا۔

افسوس انگریز سنگھ کی یہ چال کامیاب نہیں ہوسکی اور تصدیق کے عمل کے دوران اس کے فنگر پرنٹس میچ نہ ہونے کی صورت میں سیکیورٹی افسران نے  فوری طور پر اس عمل کی شکایت درج کروائی۔

اس شخص کو پکڑنے کے بعد اس کے خلاف شکایت درج کرائی گئی اور اس کے خلاف قانونی کارروائی شروع کر دی گئی ہے جبکہ پرمجیت سنگھ کی درخواست بھی مسترد کر دی گئی۔

پولس کے مطابق انگریز سنگھ نے اپنی پوری کوشش کی، فرضی ووٹر اور آدھار کارڈ کا استعمال کرکے ثابت کیا کہ وہ پرمجیت کور ہے۔