انسان کی مسکراہٹ کسی کو بھی اس کا گرویدہ بناسکتی ہے لیکن کیا ہوگا کہ جب یہی کسی کی موت کی وجہ بن جائے۔

حال ہی میں بھارت میں پیش آنے والے واقعے نے سوشل میڈیا پر ایک نئی بحت کو جنم دیا ہے جس دوران اپنی مسکراہٹ کو بہتر بنانے کے خواہشمند شخص کی موت ہوگئی ہے۔

اس حوالے سے پولیس نے بتایا کہ اپنی مسکراہٹ کو بہتر بنانے کا خوہشمند ایک شخص سرجری کے دوران فوت ہوگیا ہے جس کا تعلق حیدرآباد سے ہے۔

پولیس نے بتایا کہ 28 سالہ لکشمی نارائن ونجم کی موت 16 فروری کو حیدرآباد کے جوبلی ہلز میں واقع ایف ایم ایس انٹرنیشنل ڈینٹل کلینک میں ‘اسمائل ڈیزائننگ’ کی سرجری کے دوران ہوئی تھی۔

پولیس نے بتایا کہ ونجم، جو اپنی شادی کی تیاری کر رہا تھا، مسکراہٹ کو بہتر بنانے کی سرجری کے ایک حصے کے طور پر اسے اینستھیزیا سے دیا گیا تھا، جس سے وہ بے ہوش ہو گیا لیکن افسوسناک بات یہ ہے کہ اسے کبھی ہوش نہیں آیا اور اسپتال پہنچنے پر اسے مردہ قرار دے دیا گیا۔

لکشمی نارائنا ونجم کے والد نے الزام لگایا ہے کہ ان کے بیٹے کی موت بے ہوشی کی زیادہ مقدار لینے سے ہوئی ہے اور افسوس کا اظہار کرتے ہوئے یہ بھی بتایا کہ ان کے بیٹے نے ایسی کسی بھی سرجری کے متعلق گھروالوں کو مطلع نہیں کیا تھا۔

انہوں نے بتایا کہ سرجری کے عمل سے قبل ان کا بیٹا صحت مند اور ٹھیک تھا لٰہذا ڈاکٹر اس کی موت کے ذمہ دار ہیں۔

خیال رہے کہ لکشمی نارائن ونجم کی منگنی اس کی موت سے ایک ہفتہ قبل ہوئی تھی اور ایک ماہ بعد اس کی شادی تھی جس کی تیاریاں جاری تھیں۔